Bìoball air-loidhne

2 Kòrĭn 8 - Geba Roman New Testament

Krĭstupho tòcò Adèhlu

¹ Khŏnujo, thè̆buwe tòcò, wa thaèni thĭ thîhè̆ Kib́ĭcè adèila ahluată d́ŏ Macedŏniage bu Dèòplo tòcò ḿîgè cadè̄ nu.

² Cè tòcò d́ŏ dèbadèsè̆ adozî̄ abu zè ssègnè̆ nòthò̆ hnò̆nu, zò hlòlagè zè dèphodèli d́ŏ dèthahlò̆ abu cadè̄ nu wî thîhè̆b́è htŏ.

³ Jò d́òkhŭ tèpwè htè cè tòcò ila pwĕ cè kèhta nu, kî ila d́olĭ ci i kèhta nu. Za damò hwă kî damò wa

⁴ agē belani zò khò̆ Kib́ĭcè abijakhwĭpho tòcò b́ĕ Judĕage abu nu.

⁵ Kî htô̆ wo do gomopani ńò nu, cè tòcò ilagè ane. Aŭsu nu ci ilagè ze ne d́ŏ Kib́ĭcè acukhòbu, mèhwă d́ŏ Kib́ĭcè adèthaèni ò adĕ, cè tòcò ilagè ane d́ŏ wu cukhò bu nu nu.

⁶ Mègōnu, wo thodŏkò̆ Tĭto, htè d́ŏ zo gohta htŏ dèmè akăhtî akhoacè̆, agè̄ mèphî̆htarāhta dèigetcage adèmè d́ŏ thĭ kho thĭ klè̆ nu.

⁷ Danè̆ danè̄ nu, aè̆ òè gudu ḿî thĭ lò, d́ŏ dèb́udènè, dèjî̄b́èdòdò, dèthîd́ôthîhè̆, dèthophrè̆thaphrè̆, kî ab́èlò̄ wa adogudŭ, gōnu akhoacè̆ wa sascĭi thĭ ki ila d́okhlŏ dèmèzo d́ŏ dèkhòwèhmòb́è ajo dèdè̆ abu nu.

⁸ Ajo tè b́è ju htulahmèla thĭ ńò; ḿî jô d́ôthò̆dròtca thĭ dèb́èlò̄ kî bija alewe tòcò è̆ lò.

⁹ Gomohtanibò̄ B́ĭcè Jezŭ Krĭstu athahlò̆kò̆ pwedè̄ nu. Zî ḿî ajèdā, ḿî thĭ nikhĭ Zè ssègnè̆gè, cab́ô̆htè d́ŏ Zè dèssègnè̆ abu, Zè gè̄ mè jèdābò̄ thĭ nu.

¹⁰ Acab́ô̆ jò d́ò nu, ji ikŏikja thĭ, thĭ nikhĭ ab́èklè tèpwè. Manè̄ d́o thĭ ḿîgè aŭsu, hlĕ d́emo nu, thĭ bè̄htagè thĭ tha kî gohtagè dè mè dòkhò̆.

¹¹ Gōnu acè̆, mèhtô̆mèhwăbò̄ thĭ dè mè, òibò̄ dèthasô agè̄ mèhwăge acab́ô̆ thĭ bè̄htagè thĭ tha agè̄ mèhta nu, kî mèbò̄ b́ĕ dè òni thĭ adĕ nu.

¹² Thĭ dè thasô kò ò hnèhnè ma d́ō, tè b́è d́ŏ thĭ è̆ tò ò ńò abu ńò, ḿî b́ĕ dè òni thĭ abu Kib́ĭcè gî̄ phîni tèpwè thĭ è̆.

^13-14 Tè b́è ja thaè mèphî̆hta hwă bija alewe adèb́idèzā kî tèhta thĭlò dèb́i ahtoaba ńò. Barasă khŏnujo thĭ è̆ òèòò nu ilabelanibò̄ bija aè̆ tò òni cè ńò tòcò nu dòkhò̆. Kò tò d́òwî ńò, b́eḿĕ dinitèthè̆ zi nikhĭ alablîlablô tòcò gî̄ ḿî zabò̄ thĭ dè tò ò ńò anikhĭ dèigetcage nu. Gīkhò̆lō gî̄ ḿîkò̆ jāthôthô lò.

¹⁵ Acab́ô̆ Cè Tcahtĭ d́ò, “Bija ahtuniphîni òè dèbwè anikhĭ alablîlablô tò ò ńò, ahtuniphîni tîkîpho dèbwè anikhĭ tò òbaòsè̆ ńò ńò,” nu.

Tĭto kî Akhò̆ tòcò

¹⁶ Jî thîhè̆htage Kib́ĭcè d́ŏ Cè b́è̆nī Tĭto atha bu agè̄ mèzo thĭ acab́ô̆ jè mègè nu.

¹⁷ Tè b́è d́ŏ wo thodŏ cè acè̆ khaĺè zè mèkò̆ ńò; ḿî co thosôthasô thèj́ô̆ kî ze lehtî dò̆ thĭ zo lo za la.

¹⁸ Wo thodŏlekôgè thè̆buwe htè Dèòplo tòcò d́ŏbèj́ab́è d́ŏ ab́èkja dèd́òŭsaŭ Vanzĕlō dèbwè ploplo kî cè lò.

¹⁹ D́okhlŏ kî ajo zî ḿî Dèòplo tòcò rôhta acab́ô̆ wò khò̆ wò thò agē le mè dèkhòwèhmòb́è adèmè ajo nu, d́ŏ Kib́ĭcè adòathe anikhĭ wî dîdî̄îthagè dèmèzo adèphîdèmè ajo nu.

²⁰ Wa b́u sascĭi htè dècirraphame hô̆ akhlodo pwe gōjo gî̄ dî phî̆htabò̄ dèsajò ńò nu.

²¹ Manè̄ wè mè dè ab́èklè d́ŏ Kib́ĭcè ahlò̆mò̄ kî bija ahlò̆mò̄mò̄ akhoacè̆ nu.

²² Mèhwă d́ō, agē lekô ajo gībwè akă wo thodŏle d́ò̆ wè thè̆buwe dèbwè be, htè adèthosôthasô nu wi thîhè̆b́è òè̆pla htŏ nu kî ab́u sascĭi thĭ dèbwè nu.

²³ Jo kò d́òwe ahlò̆mò̄ tîkî ḿî, Tĭto ḿî jò khò̆golō kî amèplo jè dè dèbwè; alewe gībwè ḿî Dèòplo ablô htè aḿî thĕbwe alei Krĭstu adòathe tòcò nu.

²⁴ Megōnu d́ō, d́ŏ Dèòplo lŏcăcè ahlò̆mò̄ nu d́è̆lî̄bò̄ cè thĭ dèb́èlò̄ kî thô̆htôbò̄ wa d́ŏ dèphîdophîmu thĭ akhoacè̆ nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan