Bìoball air-loidhne

2 Kòrĭn 7 - Geba Roman New Testament

¹ B́èlò̄ thè̆buthè̆we tòcò, d́ŏ dèaḿăkhai jo tòcò abu, wu ŭsab́ă d́ò̆è gajă dè amèb́ò za we neb́î̆cè kî wa tha tòcò nu, cab́ô̆htè wa gī nib́èbò̄ dèwîdètcahtĭ apĕhtazòhta d́ŏ dèscisă ni Kib́ĭcè ale abu nu.

Păulu Adèthaganāi

² Ibò̄ wa alleaklè d́ŏ thĭ thabu nu. Wè dè mèkèḿè bija dèbwè̆ ńò, wè dè mèkĕmèbrôgè bija dèbwè̆ ńò ńò, kî wa ta ăwūăthèphlègè bija dèbwè̆ ńò ńò.

³ Jo d́ò dè ajo ḿî tèb́è ja tha bāwè̄ thĭ lò dèkèḿè ńò, acab́ô̆ jò d́ò̆sa hwă htŏ thĭ nu, thĭ ògè d́ŏ wa thabu nu, wi thĭplo òplo be lò.

⁴ Jè dèsascĭi adogudŭ ò d́ŏ thĭ ò nu, kî ju khŭihè̆igè thĭ pwĕ d́ŏ wè dèbadèsè̆ akhî nu jò ò pĕhtagè kî dèmèmòhtage kî jè dèthaganāi ḿî alablîlablôgè nu.

⁵ Wo dole hwă d́ŏ Macedŏniage hnò̆nu we neb́î̆cè ajo tôklô̆ tò ò sò̆dūsòd́è̆b́è hnî̆ńò. D́okhlŏ ḿî wa tcahtîb́ègè dèbadèsè̆ ò khwè̆b́a wa, dèhtadohtara d́ŏ akhlŏathăba, dèscisă ò d́ŏ wô ôlāthabu nu lò.

⁶ Barasă Kib́ĭcè htè amèmòhtage atha lab́oladā tòcò dèbwè nu, mèmòhtagegè wa tha d́ŏ Tĭto adèdole abu lò.

⁷ Kî tè b́è htĕ zè dèdole lò ńò, ḿî dèmèmòtha htè zi nib́èkôgè d́ŏ thĭ ò akhoacè̆ nu. Cò d́ò̆sa lŏgè wa htè thĭ thaè kèhtîgè jè, thĭ khòwègè jè, thĭ b́èhjŏb́èmagè ji nikhĭ nu, khŏnujo ju khŭ jò mòhtagegè pwĕdimi d́olĭ kî hlĕ aŭsu nu.

⁸ B́eḿĕ Je hweni thĭ cè nu agè̄ mèssègnè̆ thĭ tha nu, ḿî ja da ja tèpwè je le ńò. B́ĕ ja tcahtî thĭ tha dò mò ńò tod́odasa nu, ja tha tè è tèpwè ńò.

⁹ Barasă khŏnujo ju khŭ jò mòhtagegè. Atè b́è mè jè mèssègnè̆ thĭ akhoacè̆ ńò, ḿî d́ŏ dèssègnè̆ mèni thĭ dèbajalage ane akhoacè̆ nu. Thĭ dèssègnè̆ ḿî Kib́ĭcè ŏlă dèdè̆ kî thĭ mò khab́è dèb́èhjŏ d́ŏ wò ò nu tò òb́èkò̆ dimĭ ńò.

¹⁰ Dèkhab́è ab́è B́ĭcè atha ḿî amèhtani dèb́ăkhlètha d́ŏ dèhlô̆htage anikhĭ kî amèhlè̆mè̄ dèthablè̄, barasă dèkhab́è dèssègnè̆ d́ŏ ab́èkja Lākho tè b́è jo ḿî amèni bija dèthĭ lò.

¹¹ Tcabò̄, Kib́ĭcè mèphî̆htagè thĭ dèothootha danè̄ nu. Thĭ thosôthasôgè pwedè̄? Thĭ b́è sathakă akè d́è̆lî̄ thĭ ḿî aòhlô̆gè dèkèḿè pwedè̄? Thĭ b́è mèkhethagè pwedè̄? Thĭ thaphuthaganāgè pwedè̄? Thĭ thaè nib́ègè pwedè̄? Thĭ ilagè thĭ ne pwedè̄? Thĭ thaèni dè gī cirra bija amèkèḿèdè tòcò pwedè̄? D́ŏ dè gŏmimi abu thĭ d́è̆lî̄gè htè thĭ mò b́èd́òb́èsa dimĭ tò ò ńò nu.

¹² Gōnu acè̆, je hweni nòthò̆ thĭ ô cè hnò̆nu, tè b́è dŏ amèkèḿèdè dèbwè anikhĭ ńò ńò, ab́è mèkèḿègè dèbwè anikhĭ ńò ńò. Ḿî d́ŏ Kib́ĭcè ahlò̆mò̄ nu, cab́ô̆htè jè gè̄ Mè thîhè̆bò̄ thĭ dèb́èhjŏb́èma wi nikhĭ tòcò nu lò.

¹³ Anu ḿî amèni wa dèkhodèă azî̄azô̄ d́o. Dèikhoiă ajo akhoacè̆, amèthaganāi d́okhlŏ wa ḿî d́ŏ wa tcahtî Tĭto ò thalōthala acè̆ nu, dèmòb́è thĭ d́ŏ thĭ gŏ abwè mè mòthomòtha cè acè̆ nu.

¹⁴ Ja htăikòi thĭ d́ŏ zò hlò̆mò̄ nu, ḿî thĭ d́è̆lî̄hta tèpwè jò d́ò dè ab́è lò. Wò d́ò̆sa thĭ dè ab́èabò thèjô̆ lò kî wè dèhtăikòi thĭ d́ŏ Tĭto ahlò̆mò̄ nu ḿî lŏ wò d́òdè ab́è lò lò.

¹⁵ Zè dèb́èlò̄ thĭ dohta d́okhlŏ ḿî dŏ zo gomohtani thĭ thosôthasô kî thĭ jo thĭ kègè cè d́ŏ dèd́ŏdèj́a abu nu.

¹⁶ Ja thaganāisô ḿî d́ŏ jî thîhè̆ htŏ htè ja sascĭi lŏtholŏtha za htŏ tèpwè thĭ acè̆ nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan