Bìoball air-loidhne

2 Kòrĭn 6 - Geba Roman New Testament

¹ Acab́ô̆ Kib́ĭcè adèmèpho tòcò akhò̆, wa damò thĭ akā ta tcatôĺôbò̄ Zu hlu za tă thĭ nib́è tòcò ńò nu.

² Manè̄ d́ō Kib́ĭcè d́ògè; “B́ĕ dèzwî̄dèè akhî nu, Jò sòkhĕńe htŏ thĭ; d́ŏ dèhlô̆htage amuni nu Je le mèzogè thĭ,” Cò d́ò do. Hmahŏ, khŏnujo ḿî dèzwî̄dèè akhî; khŏdini ḿî dèhlô̆htage amuni.

³ Cab́ô̆htè bija dèbwè̆ gè̄ tè kèhtîbò̄ wè dèmè agumukèḿè ńò nu, dè amèthakă bija klè nu wa dè mègè dimĭ ńò.

⁴ Dòkhò̆b́è ḿî b́ĕ wè kèhtî dèssègnè̆bòdò, dèkî̆dīî̆ô, dèbadèsè̆ akhî nu, wè d́è̆lî̄htagè wî ḿî Kib́ĭcè azôabwè d́ŏ dèkhòthad́ò̆wî̄thazô abu lò.

⁵ Wè b́èdeb́èbo, wa khab́è dèd́owè̄glo, wè b́è htadohtara, wè mè sòwè̆b́è̆tha, wò sò̆timĭsò̆daha kî sò̆taabatòò̆ lò.

⁶ Wè d́è̆lî̄hta htè wî ḿî Kib́ĭcè azôabwè d́ŏ dè òwîòtcă, dèthîhè̆, dèkhòthad́ò̆, dèkhòwèhmòb́è kî d́ŏ Spirito Tcahtĭ kî dèb́èlò̄ aplî̆atcă abu,

⁷ dèjî̄b́è adî̄ahma kî Kib́ĭcè adècô̆dèthèlè̆ abu nu, wò òi dèdî̄dèhma adèrî̄dècŭ d́ŏ wu cudèhtwè kî wu cutîcî abu nu, wò ò apradòlò d́ŏ dèthăwā akhînare abu.

⁸ Wa khab́è dèbè̄htajî kî dèd́òkè̆d́òô, dèdòbijīla kî dèhtăikòi lò. Wò òdî̄òhma nòthò̆ bija jowe wa ahlòplè dè;

⁹ bija dî thî nòthò̆ wa ńò hnò̆nu, wi mi hŏhtathèla; bija lè̄ wa athĭ, barasă wò ò thôḿô̆we tèpwè. Wè b́è dècirra, nòthò̆ hnò̆nu wè tè b́è mèthĭ ńò.

¹⁰ Dèmè othootha wa, nòthò̆nu wò òi dèthalōthala thèjô̆ lò. Bija gomo wa ḿî amò khòwè zî̄, ḿî wa thalōthala thèjô̆; bija gomo ḿî wè ssègnè̆bòdò, ḿî wè mè jèdā bija alewe dòkhò̆. Manè̄ d́ō, bija adè tò ò dimĭ ńò, ḿî wè dè ò gŏmihtĭda lò akhoacè̆ nu.

¹¹ Ŏ Kòrĭnthiapho tòcò! Wî jî̄b́èhtî danāpi htŏ thĭ, wè dègomo hlî̆htaphlò̆hta htŏ thĭ hlò̆mò̄,

¹² dè ad́îd́ăkaklè ḿî tè b́è aò wò ò dòkhò̆b́è ńò, ḿî d́ŏ thĭ dòkhò̆b́è lò dòkhò̆.

¹³ Jî jî̄b́èhtî thĭ acab́ô̆ jo pho ji li tòcò nu lò. Thĭ dòkhò̆b́è ḿî ḿî b́ăhtakhò̆bò̄ thĭ tha tîkî!

Dèithidĭ Ab́èkja Bwèthŭkupho

¹⁴ Cŏglogjî̄gloi ḿè thĭ ne kî adèb́u tò ò ńò tòcò nu ḿè. Dèzwî̄dèè tè b́è dèkî̆kkèmèhlò̆ akhò̆akhè ńò. Dèhlî̆ kî dèkhi tè b́èkjahlè lōwa ńò.

¹⁵ Krĭstu tè b́è Sătana athò ńò. Adèb́u ò dèbwè nu dè mèploaplo za adèb́u tò ò ńò dèbwè̆ ńò.

¹⁶ Kib́ĭcè aZarādo tò ò sò̆htokô kèhta bwèjòbwèja tòcò nu ńò, kî wî ḿî Kib́ĭcè ahiaphă nu, Kib́ĭcè htè aòthôḿô̆ dèbwè nu. Wò òi Kib́ĭcè adèjî̄b́è htè adò; “Ja gā prahtakò̆ Ji hi Ja phă zo kho zè klè̆; kî Jò kò̄ òkôkò̆ cè tòcò akă; Jî gî̄ ḿîkò̆ cî B́ĭcè, kî zî gî̄ ḿîkò̆ Ja bija.”

¹⁷ “Hè dòbò cè tòcò, kî ò d́ò̆è thĭlothĭlă; bōwè̄bāwè̄ ḿè dè adu rŭ ńò tòcò dimĭ ḿè; Ji gī scĭikò̆ thĭ klè,” Kib́ĭcè d́ò do.

¹⁸ “Kî Jî gî̄ ḿîkò̆ thĭ Pa, kî thĭ gî̄ ḿîkò̆ Jo pho Ji li tòcò nu, Dèado Amèzadè lŏcăcè d́ògè do.”

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan