Bìoball air-loidhne

2 Kòrĭn 5 - Geba Roman New Testament

¹ Manè̄ wî thîhè̆ d́ŏ hipho htè wò òi dŏ Lākho dawa b́è phrakè̆ hwă nu, Kib́ĭcè pradòlò wi nikhĭ hi aò lahtŭlablo htè bija da prai acukhò ńò dawa nu d́ŏ Mò̄kho nu.

² Khŏnujo d́ŏ dèkoŏgajā abu, wò sòḿò̆dôi tèpwè wè gè̄ b́è kô̆htathòhtani wa d́ŏ Mò̄kho ahi nu,

³ wa sascĭi wò gò̄ tò òhlòthô̆b́è ńò nu.

⁴ B́ĕ wò òwe d́ŏ Lākho hipho abu jo, wè dèb́i hto, wò koŏgajā, nòthò̆ tè b́è wa thaè bāphlòmĭ Lākho anebî̆cè ńò, ḿî wa thaè kô̆htathòhta ab́èkja Mò̄kho, cab́ô̆htè dè athĭ za kò d́ò̆khlègebò̄ dèò lahtŭlablo nu.

⁵ Kib́ĭcè adèthaèni wi nikhĭ ḿî ajo kî Ci ilagè wa Spirito Tcahtĭ adèaḿăkhai.

⁶ Gōnu akhoacè̆, wò òi thèj́ô̆gè dèthosôthasô. Wî thîhè̆b́è htè wò òi we neb́î̆cè tôklô̆ ahi bu nu ḿî wò òbāgè Kib́ĭcè Ahi lò.

⁷ Manè̄ d́o, wò òthôḿô̆i dèb́u lò, tè b́è d́ŏ gādŭ adè kèhtî ńò.

⁸ Wo thosôthasô kî wè dè thaèni d́okhlŏ ḿî wa gè̄ hèbākè̆ we neb́î̆cè ahi, kî òjīplo Kib́ĭcè d́ŏ Zi hi abu lò.

⁹ Barasă d́ō, d́olĭkî anu lŏcăcè ḿî, wa thaè mè b́ètha Cè, b́ĕ wò ò hi ajo abu ḿîwî, d́ŏ anu abu ḿîwî nu.

¹⁰ Manè̄, wa gŏ abwè awîakè̆ athĕbwe nu gî̄ hlî̆htaphlò̆htakò̆ d́ŏ Krĭstu ahlò̆mò̄, b́ĕ Zè dècirra alle nu, kî wa dèbwè dèbwè ladū gî̄ ḿî b́èkò̆ acab́ô̆ ca tani adĕ, d́ŏ zè dèphîdèmè awî kî adî wî ńò, d́ŏ we neb́î̆cè adèòthôḿô̆ abu nu.

Dèmèthò Kib́ĭcè d́ŏ Krĭstu abu

¹¹ Dèscisă ni Dèado ḿî danè̄ nu wi thîhè̆, mègōnu wi cwinī bija tòcò d́ŏ Kib́ĭcè ò nu. Kib́ĭcè thîhè̆ lŏklikli tèpwè wî ḿî bija danè̄ nu, ki ja sascĭ tèpwè d́ŏ thĭ olāthabu nu thĭ thîhè̆ tèpwè wa wa lò.

¹² Ajo ḿî tè b́è wè dèthaèni alewe domo akè d́è̆lî̄hta ane thĭ hlò̆mò̄ nu ńò, ḿî wa thaèni thĭ gā thaganāikô wa kă, kî cab́ô̆htè thĭ kò d́òge kèhtabò̄ bija abè̄htahtô̆ hnahnă ane bija ahlò̆mò̄ tòcò alī nu.

¹³ B́eḿĕ agā la kî ma wu blu nu ḿî, wu blu d́ŏ Kib́ĭcè anikhĭ lò. Agî̄ ḿî ma wî ḿî bija awî d́ō, anu ḿî thĭ nikhĭ lò.

¹⁴ Ajo ḿî d́ŏ Krĭstu adèb́èlò̄ doblîb́agè wo kho akhoacè̆ htè b́ĕ wo gomo bija dèbwè thĭ b́è bija alewe lŏcăcè anikhĭ, ḿî bija lŏcăcè mò thĭ b́è nu.

¹⁵ Kîd́ò̆ Ci thĭ nikhĭ bija lŏcăcè, ḿî cab́ô̆htè bija atha ò thôḿô̆ tòcò kò tò òbò̄ cè dèbwè dèbwè ladū anikhĭ lò ńò, ḿî d́ŏ Zè dèthĭ acè̆ Ca b́awè̄htoge bija lŏcăcè dèbwè anikhĭ lò nu.

¹⁶ Gōnu acè̆, khŏdini phlò̆ ahlò̆mò̄, wi di cirraphame be bija dèbwèbwè d́ŏ bija ahnèd́ă ńò. Tapla nu wi cirragè Krĭstu acab́ô̆ bija ahnèd́ă nòthò̆ hnò̆nu, khŏnujo wè dè mè be gōnu ńò.

¹⁷ Kî gajă bija aò Krĭstu abu dèbwèbwè nu, zî ḿî dèb́òla athè̆, dèb́òla alila ḿî aphlòtôlô htŏ, ḿî dèb́òla athè̆ ḿî aò b́ĕjo.

¹⁸ Dèlŏcăcè ḿî Kib́ĭcè adèmè lò. Wî ḿî athè̆d́ĕd́ò nòthò̆ hnò̆nu, d́ŏ Krĭstu akhoacè̆ Kib́ĭcè mèthògegè wa, kî cab́ô̆ gōnu akhò̆, Ci ilagè wa dèmè htè agè̄ mèthòge bija alewe tòcò kî Cè Cè.

¹⁹ Wè dèd́ò̆htôla ḿî, Krĭstu akhoacè̆ Kib́ĭcè mèthògegè bija lŏcăcè awîakè̆ nu. Kib́ĭcè dè mèhmăi tèpwè bija adèkhòwèkhòkha ńò, kî Ci ithîhè̆gè wa htè Zè mèphî̆hta bija Cò thò awîakè̆ nu.

²⁰ Wa damò thĭ d́ŏ Krĭstu ablô, ibò̄ Kib́ĭcè b́ăkhlège thĭ cab́ô̆htè thĭ tè b́è be Ce d́ĕd́ò ńò, ḿîbò̄ Cò thò Zò khò̆.

²¹ Krĭstu nu Cò òhlô̆òlakî dèkhòwè lò. Barasă d́ō, d́ŏ wè dèkhòwè acè̆ Kib́ĭcè i khanikhĭgè Cè, cab́ô̆htè wè gè̄ lè̄plo we ne kî Cè, kî nib́è Kib́ĭcè adèdî̄dèhma nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan