Bìoball air-loidhne

2 Kòrĭn 11 - Geba Roman New Testament

Păulu kî Bōhmubicè Ajòaja

¹ Ja thaèni thĭ dèkhòthad́ò̆ jè dèthokho tîkî. Ḿî thĭ khòthad́ò̆ nènògè jè hŏ.

² Tcabò̄, jè dèthaklai thĭ dèdè̆ ḿî Kib́ĭcè adèthaklai lò. Jo kŏhtakjala aki isani thĭ Krĭstu, cab́ô̆htè ji ki ikè̆ thĭ acab́ô̆ aphôthèmo atcă dèbwè d́ŏ za wa dèbwè lò acukhòbu nu.

³ Ḿî wu nu, d́ŏ zè dèlîḿakakwè̆ abu hlòplènigè Ĕva akhò̆, jè b́èhjŏ ḿî thĭ ḿî ḿî thĭ dègomo gè̄ kè̆ kî thĭ kè b́è̆lădēda thĭ dèb́èlò̄ atcahtĭ lŏthlŏtha Krĭstu, kî d́ab́a thĭ khlŏ d́ŏ Cò ò nu lò.

⁴ Manè̄ kò̄ d́òdo dō, thĭ lèkha thalōthalagè bija alehtî thĭ kî d́ò̆htô ni thĭ Jezŭ alewe acòklî kî wò d́ò̆htôlani thĭ dèbwè nu, thĭ phînigè Spirito Tcahtĭ acòklî kî thĭ nib́è hwăgè kî b́ugè Vanzĕlō htè acòklî kî thĭ nib́è htŏ wò ò nu.

⁵ Jo do gomo d́ŏ jî ḿî ascipho d́olĭ bija htè thĭ jo, “Thodŏpho” tòcò htî dimĭ ńò.

⁶ Jî gî̄ dî ḿî nòthò̆ bija ajî̄b́è plî̆thôlô za dèbwè ńò hnò̆nu, ab́èkja dèthîhè̆ nu jô tô b́ôla tèpwè ńò. Wè d́è̆lî̄ hlî̆htaphlò̆hta dôjôjô̆ htŏ thĭ hlò̆mò̄ d́ŏ klè kô̆ ab́ò̆ abu lò.

⁷ B́ĕ Jò d́ò̆sa thĭ Kib́ĭcè aVanzĕlo nu, ja da dagè thĭ asôahlè̆ dimĭ ńò. Jè bè̄b́ôla je ne cab́ô̆htè thĭ gè̄ kèhtabò̄ bija ab́è bè̄htajî tòcò anikhĭ ḿî atè b́è be ńò dòkhò̆ ā?

⁸ Ja gā khazô thĭ anikhĭ nu ja ăwūgè Dèòplo alewe tòcò nu.

⁹ Hlĕ jò òkôwe thĭ kă nu, pĭd́ŏpĭsa lōdî̄gè jè, ḿî jî dî îgè bija dèhtodèba dèbwè̆ ńò. Thè̆buwe aò d́ŏ Macedŏniage ale tòcò igetcage lŏ tèpwè jè. Jo wō laige je ne, kî jè gè̄ mè thèjô̆kò̆ gōnu cab́ô̆htè jî gî̄ tî mîbò̄ thĭ nikhĭ dèhtodèba taplă ńò nu.

¹⁰ D́ŏ Krĭstu adèdî̄dèhma aò ju bu nu akhoacè̆, d́ŏ Akhaĭage abu jo nu, jè dèjî̄b́è htajîthwi ajo dèdè̆ kè tè b́è phîkè̆ thĭwīkò̆ jè taplă ńò.

¹¹ Jè kè tè b́èlò̄ ma thĭ ńò d́ō, jè gè̄ mèbò̄ gōnu ā? Kib́ĭcè thîhè̆ tèpwè jè b́èlò̄ thĭ nu.

¹² Ja tha ò agè̄ mèwe dè htè jè mè khŏnujo tòcò nu, kî ji ti i bija athaèni dè ahjŏgā tòcò akhîagla d́ŏ agî̄ jî̄b́è dothwi nu ńò.

¹³ Bija ajo tòcò nu ḿî Thodŏpho ajòaja, bija adîdî̄dahma ńò, kî athô̆blôhta ane acab́ô̆ Krĭstu Thodŏpho tòcò nu nu.

¹⁴ Dè amò htèdômô̄dahmă ale tò ò tèpwè ńò. Sătana hnò̆nu thô̆blôhta za ane acab́ô̆ dèhlî̆ amò̄khobwèzo lò.

¹⁵ Zô zô zè bwè tòcò ḿî ḿî gô̄ thô̆blôhta za ma ane acab́ô̆ dèdî̄dèhma azôabwè nu d́ō, amò htèdômô̄dahmă ale tò ò tèpwè ńò. Agudulă zi gī nib́è tèpwè zò mò tani tòcò nu.

Păulu Adèkhab́è Acab́ô̆ Thodŏpho Dèbwè

¹⁶ Acab́ô̆ jò d́ògè hlĕ akăhtî nu, bija gō do gomo d́ò̆è jè acab́ô̆ ablu dèbwè̆ ńò. Ḿî thĭ gō gomo do d́ō, lè̄ d́ò̆è jè acab́ô̆ ablu dèbwè nu, kî jî gî̄ jî̄b́è htajîthwi d́ò̆è jè.

¹⁷ Jò kò d́ò dè khŏnujo tòcò ḿî tè b́è Kib́ĭcè hna d́ò jè ńò, ḿî jò kò d́ò tŏmutosă d́ō, jò mò jî̄b́è htajîthwi tò ò tèpwè dimĭ ńò.

¹⁸ Bija òè̆bwè htăikòi ane d́ŏ zè dèphîdèmè ab́èkja Lākho adèphî̆htarāhta akhoacè̆ akhò̆ nu, jè gè̄ mèkôkò̆ gōnu nu.

¹⁹ Thĭ thè̆ne ḿî bija azaabla thĕbwe akhoacè̆, thĭ khòthad́ò̆i kèhta tèpwè ablu tòcò d́ŏ dèthalōthala abu nu; B́èhŏ,

²⁰ thĭ khòthad́ò̆ bija htè athodŏhtathodŏla thĭ acab́ô̆ zôbwè, aăwū thĭ dè, aadū thĭ kho, atcadalakă thĭ kî ad́è nī thĭ mūkă bu tòcò nu lò.

²¹ Athăwā ŏlă jè d́ŏ wò tò òi dèkhŭdèhè̆ pwĕ agè̄ mèthĭ gōnu ńò acè̆ nu. Barasă bija athaè jî̄b́è khetha kò ò b́eḿĕ dèbwèbwè d́ō, jî jî̄b́è acab́ô̆ bija ablu, ju khŭ tèpwè pwĕ gōnu nu.

²² Cè tòcò ḿî Hebrè̆upho ā? Jî ḿî Hebrè̆upho pho. Zî ḿî Israè̆lpho ā? Jè ḿî ḿî. Zî ḿî Abraham akhwĭthèlè̆ ā? Jè ḿî ḿî.

²³ Zî ḿî Krĭstu azôpho tòcò ā? Ja lă kî tèpwè ablu, b́è tèpwè hŏ! Jî ḿî d́okhlŏ Krĭstu azôpho, manè̄ d́ō, jè mèsòẃè̆ d́olĭ cè tòcò. Ja ladēnī dèkî̆dî̄ bu dôjôjô̆ lò, jè b́èdeb́èbo d́okhlŏ we, htô̆kî ja thamò̆ thĭ òè̆pla lò.

²⁴ Ja khab́è Jŭdapho tòcò hlîplè̆ jè sŏscĭlwīthô dikhlî, jè̄pla.

²⁵ Rŏmapho tòcò hlî i jè hnî̆klò thŏpla; ja khab́è dè hwĕ jè lo tapla, thè̆bò laphrani jè thŏpla, kî tapla nu jò òb́è htĭ pèllèbu dènè kî dini lò.

²⁶ Jè hèb́è thèjô̆ klè, dèb́èhjŏ ò d́ŏ lò̄do bu kî dehwĕpho tòcò acukhòbu, jò khò̆dî̄khò̆d́ŏ acukhòbu, d́ŏ bwèthŭkupho tòcò adèhtathakă abu, dèb́èhjŏ ò ji nikhĭ d́ŏ u bu d́ŏ bu, d́ŏ hmîlè̄klè̆, d́ŏ pèllèbu, kò d́òb́è jò khò̆ jè khè ajòaja tòcò acukhòbu nu nu.

²⁷ Jî phîdèmèdè sòwè̆b́è̆tha, dò sòḿĭsò̆hab́è ńò; jò sò̆taabatòò̆, òè̆pla alad́òlaphlî jè, jò òhlòthô̆ kî khab́ègè dèhòdèscwi, dèssègnè̆bòdò lò.

²⁸ Akhlŏ nu jè b́èhjŏb́èma b́è Dèòplo lŏcăcè anikhĭ khĭ.

²⁹ Bija dèbwèbwè akho gē ze ă gē ze d́ō, jo khozeăzekô ca kă; agā lakhulatoklŏ dèbwèbwè d́ō, jò ò pĕhtakî dègodègè̄ lò.

³⁰ Ja gā htăi b́è ma je ne d́ō, ja htăi b́è jè dèthokho lò.

³¹ Kib́ĭcè htè B́ĭcè Jezŭ apa ami b́èhôwî thèjô̆; Ci thîhè̆ tèpwè tè b́è jè plè ńò nu.

³² B́ĕ jo ò Damăskus u nu, saphra Arĕtas b́è̆lă bija khwè̆b́a u agô̄ pô jè anikhĭ lò.

³³ Barasă d́ō, bija cŭlădē b́è jè u htărā aphò̆bū akhlŏ d́ŏ ṕahlu abu, agè̄ cwèhlô̆hta d́ŏ cu cukhò bu anikhĭ nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan