Bìoball air-loidhne

1 Timò̆theo 6 - Geba Roman New Testament

¹ Bija htè aḿî amèdèpho tòcò nu b́è lè̄dakè̆ ab́icè tòcò acab́ô̆ bija ata kî dèd́ŏdèja lŏklikli lò. Anu khaĺè bija dèbwè̆ tò d́òkè̆d́òôkò̆ Kib́ĭcè ami kî wè dèthèhlô̆ ńò nu.

² Cî b́icè tòcò gî̄ ḿî bija ab́udè ḿî ḿî, zè lè̄ lōwa acab́ô̆ thè̆buthè̆we acè̆, cè tè b́è mèjòla zè dèd́ŏdèj́a lōwa ńò. D́ŏnu agò̄hta, ḿî zi nihlunită d́ŏ lōwa ò akhoacè̆, zò mò mèni è d́okhlŏ ab́udè htè cè b́èlò̄ tòcò adèmè nu dòkhò̆. Nè b́è thèhlô̆ kî d́ò̆htôla dè ajo;

Dèthèhlô̆ Akèḿè kî Dèjèdā Hnèhnè

³ Bija dèbwè htè adèthèhlô̆ dèb́udènè ada jāthô B́ĭcè Jezŭ Krĭstu adèjî̄b́è adî̄ahma ńò tòcò, kî dèthub́uthèb́è̆ adèd́ò̆htôla da jāthô wè è̆ ńò tòcò nu,

⁴ ḿî bija abè̄htahtô̆ ane, kî adî thîhè̆ da dimĭ ńò tòcò lò. Dèthodanāthadanā tò ò zu bu ńò, kî ca thagolō jadè kî goitrai bija d́ŏ dèjî̄b́è ahmô̆athè tòcò akhoacè̆, dè ajo akèhta dèthakla, dègodètra, dègòsè̆lèwè̄, dègomogamā akî̆kkèmèhlò̆ tòcò,

⁵ kî akèhta dèlad́òlasa hlè lōwa dèjwèjwè lò. Bija amè gōjo tòcò ḿî atha ta danā ńò kî atò òi dèdî̄dèhma ńò tòcò lò. Zo gomo cè è̆ ḿî dèthub́uthèb́è̆ ki icè dèjèdā lò.

⁶ Ab́èhŏ, b́ĕ dè òni wa atherĕ wî ḿî thoḿĭthamò d́ō, dèthub́uthèb́è̆ mèni tèpwè wa dèjèdā adoamu lò.

⁷ B́ĕ we lela Lākho jo akhè̆ nu, we de lei da dimĭ ńò. Wa hèhta d́ŏ Lākho akhè̆ ḿî ḿî wè dè hèhtai za da dimĭ ńò ńò.

⁸ Mègōnu d́ō wô kô̆ wò thò kî wè dèadèò̆ kò ò ma d́ō, ḿî dèpĕdèzò wi nikhĭ lò.

⁹ Barasă d́ō bija htè athaphî̆hta ajèdā tòcò nu, ladēnī dèhlòdèplè aklè̆ kî b́è cakwani dèthanido kî dèhnahnă adēkha abithagwă lò. Dèthanido mèphî̆htagè dèhèwî̄hèkè̆ kî dèssègnè̆ lò.

¹⁰ Manè̄ d́ō, dèb́èlò̄ hô̆htè̆ ḿî dèkî̆kkèmèhlò̆ lŏlō akokhwi lò. Bija tòcò cò thosôthasô wāhlè hô̆htè̆ htô̆kî adèb́u dîwî̄dewe, atha gogè̄hwèlî, kî othoothab́è lò.

Dèhmèla ni Timò̆theo

¹¹ Ḿî nè, Ŏ Kib́ĭcè Abija, hèkô̆bò̄ dè ajo lŏcăcè nu. Htukhohtuăbò̄ d́ŏ dèdî̄dèhma, dè è dèthub́uthèb́è̆, dèb́udènè, dèb́èlò̄thòklè̆, dèkhòthad́ò̆ kî dèb́îdèjū anikhĭ.

¹² Dèb́udènè adècwè nu, cwè thĕbwethîlî̆bò̄, kî phînibò̄ ni nikhĭ dèthôḿô̆ lahtŭlablo. Manè̄ d́o, Kib́ĭcè jo nè d́ŏ dèthôḿô̆ jo abu htè b́ĕ no ŏlăphlala, mèhmemèglo nè dèb́u d́ŏ bija òè̆bwè ahlò̆mò̄ nu.

¹³ D́ŏ Kib́ĭcè htè ai dèthôḿô̆ lŏcăcè, kî Jezŭ Krĭstu, htè ad́è̆lî̄ dèb́udènè ahmeaglo d́ŏ Pò̆nsio Pilăto agādŭ bu dèbwè ahlò̆mò̄, jè hmèla nè,

¹⁴ lôkô mèkôibò̄ dèhtulahmèla nè tòcò jo d́ŏ thodî̄thahma abu htô̆ dola muni d́ŏ B́ĭcè Jezŭ Krĭstu kè d́è̆lî̄htage kòd́ò̆ ane nu.

¹⁵ Zè dèlela kè̄ b́è d́è̆lî̄htakò̆ b́ĕ asŏ b́è akhè̆ b́è d́ŏ B́ĭcè, htè ab́èhôwî kî aŭidè htĕ dèbwè lò, saphra tòcò asaphra, B́ĭcè tòcò aB́ĭcè nu.

¹⁶ Zî ḿî Kib́ĭcè dèbwè lò htè adi thĭ za ńò, Cò ò d́ŏ dèhlî̆ htè bija dèbwè̆ de leb́ôhtî za ńò abu lò. Bija dè kèhtîb́è htŏgè Cè dèbwè̆ ńò, kî bija dè kèhtî za Cè dèbwè̆ ńò ńò. Dèdòdothedo, dècô̆dothèlè̆htô̆ kò òkî d́ò̆bò̄è Cè alahtŭlablo. Amèn.

¹⁷ Hmèlabò̄ bija ajèdā d́ŏ Lākhokhlŏ jo tòcò, cab́ô̆htè zè gè dè lè̄dolè̄mubò̄ ze ne ńò, za gā da sascĭibò̄ zi dî̄ zè dè htè atò òhmeòglo za ńò tòcò nu ńò, ḿî zò mò sascĭi Kib́ĭcè htè ai wa dèmòdèma lŏcăcè d́ŏ dèthathòhlò̆ abu dèbwè nu.

¹⁸ Hmèla cè tòcò agè̄ mèwî dè, agō dohtamuhtai dè mè awîab́è tòcò nu, akî ibò̄ dè d́ŏ dèthathòhlò̆ abu nu.

¹⁹ D́ŏ dèjo akhoacè̆, cò kò d́ò̆lănikò̆ dèlīdobwîthè̆ akăd́ò̆ d́ŏ sŏkhè̆ ahlò̆mò̄ anikhĭ, gī nib́è dèthôḿô̆, htè aḿî dèthôḿô̆ hnèhnè nu.

²⁰ Ŏ Timò̆theo, tcaiôi thuŭthèèbò̄ dèila nè aò nu cukhò bu tòcò nu. Hèkô̆bò̄ dèjî̄b́è dîdî̄dahma ńò, kî dèjî̄b́è hnahnă hnahnă, htè bija tòcò cò d́ò kèḿè è̆ “dèhtî̆nigô̄ni” nu.

²¹ Manè̄ kò̄ d́òdo dō, bija tòcò cò d́ò d́ŏ cò òigè dèhtî̆nigô̄ni, kî ze dèb́udènè aklè hlè̆mè̄ thĭwī cè lò. Kib́ĭcè adèhludètă kè̄ b́è dò̆bò̄è thĭ lŏcăcè tîkî.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan