Bìoball air-loidhne

1 Timò̆theo 5 - Geba Roman New Testament

Dèmèi Ab́udè tòcò

¹ Amikhŏ athabwe d́olĭ nè nu, hò̆bò̄ ḿè cè ḿè, ḿî mèibò̄ cè acab́ô̆ na pa nu, kî jî̄b́èhtîmòbò̄ cè. Amikhŏ athaze d́olĭ nè tòcò nu, lè̄bò̄ cè acab́ô̆ nî ṕîkò̆,

² amihmu athabwe d́olĭ nè tòcò nu, lè̄ cè acab́ô̆ no mo akhò̆, kî athaze d́olĭ nè tòcò nu acab́ô̆ nu bu nè cè, mèibò̄ cè d́ŏ dèthowîthatcă abu nu.

³ Lè̄d́ŏlè̄j́abò̄ ahmugèmè hnèhnè tòcò nu.

⁴ Barasă ahmugèmè dèbwè ḿî òkî apho ḿîwî, ali ḿîwî nu, cè tòcò kè̄ b́è mèhlô̆ihŭ ŭsu ahiphophăpho dèthub́uthèb́è̆ anuad́ò̆, kî dèthîhè̆htage phĭ phŭ mo pa tòcò ahluată, kî igetcage cè tòcò nu. Ajo ḿî dè ab́è Kib́ĭcè atha lò.

⁵ Ahmugèmè htè aò dèbwè lò kî bija atcaiôi cè tò ò ńò dèbwè nu, za sascĭi Kib́ĭcè, cu thèb́è̆ kî dahta Kib́ĭcè adèmèzo thè̆ musè̆munè lò.

⁶ Barasă ahmugèmè htè alôi anikhĭ dèmòdèma nu, cô thôḿô̆ nòthò̆ hnò̆nu, zî ḿî bija athĭgè dèbwè lò.

⁷ Cab́ô̆htè ahmugèmè tòcò da khab́èbò̄ dè lè̄ dèkèḿè Zò lò dèbwè̆ ńò anikhĭ nu, htôlathèlabò̄ cè tòcò dè ajo.

⁸ Bija htè adi igetcage akhwĭakhò̆ ńò, lasădè̆è ahiphophăpho kî ane ńò tòcò nu, ḿî ajab́igè dèb́udènè, d́ō zî ḿî azî̄ d́olĭ adèb́u tò ò ńò tòcò nu.

⁹ Ahmugèmè dèbwè nu ze d́e ḿî pĕhta ascĭthăthô ge agò̄hta khaĺè, b́è̆nīkò̆ cè d́ŏ ahmugèmè acèrè̆ bu, zi gī ḿîb́è bija htè aphîcu tapla lò.

¹⁰ D́ŏnu agò̄hta, cè b́è ò kî zi mi zè khè̆ awî, bija ab́oi dohta aphoali thuŭthèè, amèi tî̆dotî̆tèḿè̆, aŭsab́ă Kib́ĭcè abija Tcahtĭ tòcò akhakhò, amèzo bija òbaòsè̆, aila ane d́ŏ dèmè awîab́è lŏcăcè tòcò nu.

¹¹ Ḿî ahmugèmè athaze we tòcò nu, b́è̆nī ḿè cè d́ŏ cèrè̆ bu ḿè. Manè̄, d́ŏ cè tòcò apheahî adèthaèni acè̆, ḿî thaè phîphophîwa d́ō, ze mè tud́ukhlŏ za ze ne kîd́ò̆ Krĭstu,

¹² kî zè mè laphrakè̆ zè dèŏlăphlala Kib́ĭcè hlĕ aŭsu tòcò nu lò.

¹³ D́ŏnu agò̄hta, ca tha mè lōsŏlōkhè̆ ze ne d́ŏ dèhè bija hi, hta dawa la dawa lò. D́olĭ kî anu, cè tòcò thagolō d́òmēsepwè bija, kî wî̄nīsanī d́ò dèjî̄b́è htè atè b́èkja cè ńò tòcò nu za tèpwè lò.

¹⁴ Mègōnu akhoacè̆, ja thaèni ahmugèmè athozethaze tòcò gî̄ phîphophîwa, tcai ahiaphă, cab́ô̆htè cè tòcò dī nib́èbò̄ akhwè d́ŏ akò̄ d́òmēsepwè wa ńò anikhĭ nu.

¹⁵ Manè̄ kò̄ d́òdo dō, khŏnujo ahmugèmè tòcò cò d́ab́agè akhlŏ d́ŏ agô̄ lôkô Sătana akă nu.

¹⁶ Barasă d́ō, amihmu htè ab́udè dèbwè ahibu, ahmugèmè ḿî ò ma d́ō, cè kè̄ b́è itca lōwa cab́ô̆htè cè tòcò gè̄ tè kèhtabò̄ dèb́idèzā d́ŏ dèòplo anikhĭ ńò nu. Manè̄ kòd́òdo dō, dèòplo b́è itca ahmugèmè tòcò akhoacè̆ lò.

¹⁷ Dèòplo akhoane htè amè thuŭthèè dè dèbwè nu, zò mò nib́è dèsôdèhlè̆ gīplabu, lasăd́è̆è amè sòẃè̆b́è̆tha ane d́ŏ dèd́ò̆htôla kî dèthèhlô̆ tòcò nu.

¹⁸ Manè̄ kòd́òdo dō, Cè Tcahtĭ d́è̆lî̄hta, “Bo htè ajî b́u nu, sòb́i ḿè alòmò păkhra ḿè,” kî “Dèmèpho ta nib́è asôahlè̆,” ad́ò do.

¹⁹ Dèbè̄ dèkèḿè d́ŏ dèòplo akhoane alò nu, thè̆thî ḿî tò ò asciphogudu gībwè, thŏbwè ńò nu, sòkhĕńekôbò̄ ḿè.

²⁰ Bija htè amè dèkhòwè gŏ abwè nu, mèjabò̄ cè tòcò d́ŏ bija òè̆bwè ahlò̆mò̄, cab́ô̆htè zi gī scisăbò̄ anikhĭ nu.

²¹ Jè hmèla nè d́ŏ Kib́ĭcè, Jezŭ Krĭstu, kî Mò̄khobwèzo atcahtĭ tòcò ahlò̆mò̄, sòkhĕńebò̄ dèthôdèthò̆ tòcò jo, nè mèdè dimimi abu nu, òibò̄ ḿè dètcadotcasci ḿè, dètcamô̄ ḿè ḿè.

²² Mègôlô̄gelebò̄ ḿè dèhôwîhta bija d́ŏ amè Kib́ĭcè adèmè anikhĭ dèbwè̆ ḿè. Mè b́èkja ḿè ne ne kî amè dèkhòwè tòcò ḿè. Ò wî ò tcăbò̄ ne ne.

²³ Ni scwihta dèjwèjwè akhoacè̆, cab́ô̆htè nu phŭbu agè̄ è anikhĭ, Ò̆bò̄ ḿè htĕ htĭ lò ḿè, ò̆bò̄ thobiscihtĭ tîkî tîkî.

²⁴ Bija tòcò cò adèkhòwè lî̄htaphlò̆hta kî le ŭsu tèpwè d́ŏ dècirra anikhĭ nu. Barasă tòcò cò adèkèḿè b́è d́èlî̄htakò̆ d́ŏ alekă nu.

²⁵ Cab́ô̆ gōnu akhò̆, bija dèmèwî tòcò nu lî̄htaphlò̆hta tèpwè. Kî adî lî̄hta hnî̆ńò tòcò ḿî ḿî tè b́è lè̄hu za ńò ńò.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan