Bìoball air-loidhne

1 Timò̆theo 4 - Geba Roman New Testament

Sara Aplè tòcò

¹ Spirito Tcahtĭ d́ò̆sa ladīlasegè d́ŏ muni akŭdulă nu, bija tòcò cò gò̄ sòkhĕńe tha ahlòplè dè tòcò adèthôdèthò̆, gô̄ lôkô dèscidèhnè akă kî gā bāphlòmĭ adèb́u ajo lò.

² Dèthèhlô̆ ajo tòcò ḿî ahlòaplè dè kî amèmômā ane, htè atha thĭgè acab́ô̆ htalago gè̄hòathĭgè akhò̆ nu.

³ Bija gōjo tòcò mèd́îd́ă dèphîcu, kî hmèla lōwa tòcò aku d́ua dè htè Kib́ĭcè b́òla d́ŏ bija ab́udè kî athîhè̆ dèdî̄dèhma tòcò htăhtai dèhludètă kî ab́è tòcò nu.

⁴ Manè̄ kò̄ d́òdo dō, gaj́ă Kib́ĭcè adèb́òla ḿî awî lò, kî bija ḿî phîni d́ŏ dèhtăhtai dèhludètă abu nu d́ō, adò mò phîni ńò tò ò tèpwè dimĭ ńò.

⁵ Manè̄ d́ō, Kib́ĭcè Alēahwè kî dèdathèb́è̆ akhoacè̆, amè tcahtĭge lŏcăcè lò.

Jezŭ Krĭstu Akhî̆abwè Aè

⁶ Dèhtulahmèla ajo tòcò nu nî ḿî ithîhè̆ nè thè̆buthè̆we tòcò d́ō, d́ŏ nò lôkômèkô dèb́udènè adî̄ahma akhoacè̆ nu, nî gî̄ ḿî tèpwè Jezŭ Krĭstu akhî̆abwè aè dèbwè.

⁷ Hèkô̆bò̄ adî thîhè̆ B́ĭcè ńò adèd́ò̆sai hlemo adèlèblo ahnahnă tòcò nu, kî thèibò̄ ne ne ab́èlò̄ dèthub́uthèb́è̆.

⁸ Dègemeelô ab́èkja neb́î̆cè nu akhlŏhtamame tèpwè hŏ. Ḿî ab́èkja tha adègemeelô nu, akhlŏhtamame d́ŏ dèlŏcăcè abu, ḿî ai kè tha adèŏlăphlala b́ĕ dèò thôḿô̆ khŏnujo htô̆do d́ŏ alekă dôzô nu.

⁹ Dèjî̄b́è ajo ḿî adî̄ahma htè bija mò phîni kî b́u pĕhtazòhta lò.

¹⁰ Wu htukhohtuă mèsòẃè̆b́è̆tha, manè̄, wè bè̄hta wè dèsascĭi d́ŏ B́ĭcè htè athôḿô̆ kî amèhlô̆htage bija lŏcăcè, lasădè̆è bija d́ŏ ab́ugenège Cè tòcò anikhĭ dèbwè abu lò.

¹¹ Hmèla kî thèhlô̆bò̄ cè tòcò dè ajo nu.

¹² Ibò̄ ḿè bija tcadalakă nè d́ŏ nî ḿî athaze acè̆ dèbwè̆ ḿè. Ḿî kèhtabò̄ bija ab́udè tòcò anikhĭ dètcahlô̆tcad́ò̆i d́ŏ nè dèjî̄b́èdòdò, dèphîdèmè, dèb́èlò̄thòklè̆, dèb́udènè kî dèthowîthatcă abu nu.

¹³ Htô̆do d́ŏ je le nu, ila no sŏ nè khè̆ d́ŏ agā phani bija aboahò tòcò Cè Tcahtĭ, d́ò̆htôlani cè tòcò kî thèibò̄ cè tòcò.

¹⁴ Tha adèila nè aò d́ŏ nu bu, htè Prò̆fèt tòcò d́ò̆sadòlò kî Dèòplo anedo tòcò wehta acukhò no kokho nu tcatôĺôbò̄ ḿè.

¹⁵ Dè anu tòcò lè̄tholè̄tha kî ilabò̄ ne ne cab́ô̆htè ne dèlehtalehtô̆ gî̄ lî̄htabò̄ d́ŏ bija lŏcăcè ahlò̆mò̄ nu.

¹⁶ Tcaikhwèi ne ne kî Tcaikhwèi kô nè dèthèhlô̆. Nî ḿî mègōnu d́ō, nè thè̆ne gī nib́èkò̆ dèhlô̆htage ploplo kî bija htè athîhè̆ nè dèd́ò̆htô tòcò nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan