Bìoball air-loidhne

1 Timò̆theo 3 - Geba Roman New Testament

Dèòplo Akhoane tòcò

¹ Bija dèbwèbwè ḿî thasô d́ŏ agè̄ kèhta Dèòplo akhoane nu, ḿî ca thaèni dè aè lò.

² Dèòplo akhoane kè ḿîb́è bija ahlô̆ala kî dèkèḿè, ahmè̆ b́è ò dèbwè lò, asòiwoi ane, aòthăbrā, aòb́îòjū, ab́èlò̄ tî̆dotî̆tèḿè̆, kî athèihŭ zadè lò.

³ Tè b́è ḿî bija aò̆hmuapò, agoatra, mèhtîmèbo bija ńò. Zi gî̄ ḿîb́è bija aòcoòkhli kî ab́èlò̄ dèjīdèd́wă lò. Zî dî ḿîb́è bija ab́èlò̄ hô̆htè̆ ńò.

⁴ Cè kè̄ b́è ḿî bija ad́òisai za ahiphophăpho thuŭthèè, zo pho zi li gò̄ sòkhĕńelēthèhô̆ kî d́ŏb́èj́ab́è cè lò.

⁵ Manè̄ bija atò d́òisaikèhta ahiphophăpho ńò dèbwè nu, zo gō wōikèi za d́ò̆ Kib́ĭcè aDèòplo cadè̄?

⁶ Cè tè b́è ḿî bija ab́ugenège dè athè̆lè̄kho dèbwè ńò. Cè kè̄ b́è ḿî bija htè aòi dèb́u ahmeaglo, adè bè̄htahtô̆ ane ńò kî gā da khab́èkò̆ dècirra, acab́ô̆ Mod́èlî khab́ègè nu ńò.

⁷ Bija htè aò d́ŏ Dèòplo akhlŏathăba tòcò hnò̆nu gè lè̄d́ŏlè̄j́ab́è cè, cab́ô̆htè za da khab́èbò̄ dè mè thăwā ńò, kî da ladēnibò̄ Mod́èlî adēkha abu ńò anikhĭ nu.

Amèzodè d́ŏ Dèòplo abu tòcò.

⁸ Bija Amèzodè d́ŏ dèòplo abu tòcò ḿî ḿî gî̄ ḿîb́è bija akjîamô è, ad́ò dèdî̄dèhma. Tè b́è ḿî bija aò̆ thobiscihtĭ òèsô kî adèthanido hô̆htè̆ tòcò ńò.

⁹ Cè tòcò kè̄ b́è ḿî bija apôglohme dèb́udènè adî̄ahma d́ŏ dèthohlî̆thahlî̆ abu nu.

¹⁰ Cè kè̄ b́è dèhtôdèd́è̆ ŭsu Hwă d́ō dè amòd́òmòsa tò ò htŏ ńò khaĺè, dè ki ikò̆ zè mè Dèòplo adèphîdèmè.

¹¹ Cab́ô̆ gōnu akhò̆, hmè̆ tòcò kè̄ b́è ḿî bija akjîamô è, atò d́òmēsepwè ńò, aòthăbrā, cî ḿîb́è bija aòb́îòjū, òdî̄òhma d́ŏ dèlŏcăcè abu nu.

¹² Bija amèzo Dèòplo dèbwè nu, cè kè̄ b́è ḿî bija aphî ahmè̆ dèbwè lò, kî kè ḿîb́è bija ad́òisai za aphoali, ahiphophăpho thuŭthèè lò.

¹³ Amèzo Dèòplo htè amè thèèzènè tòcò nu, za gā khanib́è dèlè̄d́ŏlè̄j́a kî cò d́òkhŭsakhŭ ab́èkja dèb́udènè Jezŭ Krĭstu abu nu.

Dèòhu Adoajò̄

¹⁴ B́ĕ je hweni nè cèborŏ ajo akhè̆ nu, ja sascĭ d́ŏ tò òjî̄ ńò je gē ledohtî nè lò.

¹⁵ B́eḿĕ je gē de ledohtî nè d́ŏ aplă ńò d́ō, cèborŏ jo gî̄ ḿîbò̄ dèithîhè̆ nè d́ŏ nè kè̄ b́è ò thôḿô̆ Kib́ĭcè ahigumu abu cadè̄ nu. Higumu ajo ḿî B́ĭcè athôḿô̆ Adèòplo htè aḿî dè akhahtu, azāhtagloi dèdî̄dèhma lò.

¹⁶ Dèthub́uthèb́è̆ adèòhuòb́i nu adoajò̄ pwedè̄ nu bija da jab́i za dèbwè̆ ńò. Kib́ĭcè d́è̆lî̄hta Ane acab́ô̆ bija, Cè b́è dèbè̄dî̄bè̄hma Cè d́ŏ Kib́ĭcè atha, Cè b́è dètcahtî Cè d́ŏ Mò̄khobwèzo tòcò, Cè b́è dèd́ò̆htôlai d́ŏ bija lŏcăcè, Cè b́è dèb́u Cè d́ŏ Lākho thèdè̆b́è, Cè b́è zāhtage Mò̄kho d́ŏ dèdòdèthe abu nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan