Bìoball air-loidhne

1 Timò̆theo 1 - Geba Roman New Testament

¹ Jè, Jezŭ Krĭstu abwè Thodŏpho Păulu, d́ŏ Amèhlô̆htagedè wa B́ĭcè kî Jezŭ Krĭstu wè dèsascĭi ila alē akhò̆,

² je hweni Timò̆theo, htè d́ŏ dèb́u abu aḿî jo phokhŏ hnèhnè cèborŏ: B́ĭcè Pa kî B́ĭcè Jezŭ Krĭstu ki ila d́ò̆è nè ahluată, dèkhòwèhmòb́è kî dècodèkhli.

Dèithidĭ ab́èkja Dèthôkèḿèthò̆kèḿè

³ B́ĕ Je le d́ŏ Macedŏniage kî jè hmèla nè akhò̆ nu, ja thaèni ńò kò òwe b́ĕ Ephè̆sus u abu nu. Bija aò b́ĕnu tòcò thôlathò̆lagè dèb́uphrò, ja thaèni na gā hna sò̆tab́a cè tòcò.

⁴ D́ò̆sabò̄ cè tòcò agè̄ lè̄dakè̆ dèd́ò̆sa hlemo adèlèblo tòcò kî johtabahtage dèlakhwĭlathèlè̆ atu kŭdu za ńò tòcò htè amèòhta dèd́òdèsa nu. Dè ajo tòcò tè b́è amèlehtalehtô̆ Kib́ĭcè adèthaèni ńò, ḿî d́ŏ dèb́u abu lò dòkhò̆.

⁵ Dèhmèla ajo ḿî cab́ô̆htè agò̄ htowè̄ dèb́èlò̄ òhta d́ŏ dèthowîthamò, dèthotcăthatcă, , kî dèb́u ahnèhnè abu lò.

⁶ Bija tòcò cò b́adebe ane kî dè ajo tòcò kî hèkèḿè klè d́ŏ dèlad́òlasa hlè lōwa dèhnahnă abu lò.

⁷ Ca thaè kèhta tèpwè Kib́ĭcè adèthôdèthò̆ asara, nòthò̆ hnò̆nu, cò d́ògè danè̄, kî dè htè cu b́u hnèhnè ḿî danè̄ nu zî dî thîhè̆ cè è̆ ńò.

⁸ Wa thîhè̆ htè dèthôdèthò̆ èzî̄ tèpwè b́ĕ dè mèi klèthòò̆ b́è abu nu.

⁹ Dèthôdèthò̆ tè b́è mèhta d́ŏ bija awîaè tòcò anikhĭ ńò, ḿî bija htè akhè̆b́ajāb́a dèthôdèthò̆, adò sòkhĕńelēthèhô̆ dè ńò, adî thîhè̆ B́ĭcè ńò, dèkhòwèpho, adu rŭ dò rò ńò, amèthĭ apa, amèthĭ amo, amèthĭ bija,

¹⁰ amèlakèḿè dè, asòḿĭplo amihmu mikhŏ jāthôthô, apô sè̆a bija, ahlòplè dè, akhathè̆thî dîdî̄dahma ńò, kî ahtad́ĕd́ò dèdî̄dèhma tòcò anikhĭ nu.

¹¹ Dèthèhlô̆ ajo tòcò ḿî Kib́ĭcè aphlŭdotheredo kî ab́è dèhôwî dèbwè aVanzĕlo, htè ab́èila ju cukhò bu, cab́ô̆htè jò kò d́òhlî̆hta anikhĭ lò.

Păulu Adèhtăhtai Kib́ĭcè

¹² Ja htăhtai B́ĭcè Jezŭ Krĭstu htè aisôhtagè jo kho ja ă dèbwè adèhludètă lò. Manè̄ Zè lè̄gè jè acab́ô̆ bija asciatakî rôhtagè jè agè̄ mè Zè dèmè akhoacè̆ lò.

¹³ Hlĕ aŭsu nu, jò gòsè̆lèwè̄ Cè, mèjūlakăkè Cè, Sòlŭsò̆jè̄ Cè, nòthò̆ hnò̆nu, ḿî ju tu b́u Cè hnî̆ńò kî jè mègè danè̄ danè̄ nu jî dî thîhè̆gè jè è̆ ńò akhoacè̆, ji nib́è Kib́ĭcè adèthakhòwè lò.

¹⁴ Kib́ĭcè hlòlahtè̆lă Cu hlu Ca tă lablîlablô d́ŏ jò lò, kî Ci ila jè dèb́udènè kî dèb́èlò̄ htè aò d́ŏ Jezŭ Krĭstu abu nu.

¹⁵ Ajo ḿî dèjî̄b́è adî̄ahma d́ŏ amò phîni kî b́u hnèhnè lò. Jezŭ Krĭstu la d́ŏ Lākho jo ḿî cab́ô̆htè Zè gè̄ mèhlô̆htage dèkhòwèpho tòcò, d́ŏ aklè̆ ji ḿî dèkhòwèpho akî̆kkègudŭ dèbwè nu.

¹⁶ Barasă Kib́ĭcè thakhòwè jè lò. Manè̄, cab́ô̆htè agî̄ ḿîbò̄ dè ad́ô̆ d́ŏ bija ab́u B́ĭcè kî nib́è dèthôḿô̆ lahtŭlablo alekă tòcò anikhĭ nu, Jezŭ Krĭstu d́è̆lî̄hta pĕhtazòhtagè adèkhòthad́ò̆ jè, htè dèkhòwèpho akî̆kkègudŭ dèbwè nu.

¹⁷ Saphra aŭidè lahtŭlablo, thĭ dî thî òda za ńò, dè tè kèhtîôhtî za ńò ńò, Kib́ĭcè ò htĕ dèbwè, kè̄ b́è d́ò̆bò̄è dèdòdèthe, dèhĭdèhtè̆ thèjô̆ lahtŭlablo! Amèn.

¹⁸ Jo pho Timò̆theo, jè hmèla nè dè ajo ḿî dèlôkô Prò̆fèt adèd́òhnèdòlò ab́èkja nè nu. Sòthŏibò̄ dè ajo tòcò acab́ô̆ dèrî̄dècŭ, cab́ô̆htè no gō d́obò̄ dèd́o awîaè anikhĭ nu.

¹⁹ Òi hmebò̄ nè dèb́u kî tha adèthîhè̆ ahlî̆ nu. Bija tòcò cò dò sòkhĕńe ca tha adèthîhè̆ ńò akhoacè̆, zè dèb́u hèwî̄hèkè̆ lō tèpwè.

²⁰ D́ŏ bija anu tòcò aklè̆ Himenĕus kî Alèssăndro htè ji cirragè kî ilagè d́ŏ Sătana acukhòbu, cab́ô̆htè dè ajo gè̄ kèhtabò̄ dèmèhlô̆ zi nikhĭ kî zò gò̄ sò̆tab́abò̄ dèd́òkè̆d́òô Kib́ĭcè nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan