Bìoball air-loidhne

1 Petru 5 - Geba Roman New Testament

Kib́ĭcè Athŏbo

¹ Jè, htè aḿî athobwethabwe dèbwè damò dèòplo athobwethabwe aò thĭ klè̆ tòcò nu. Jè ḿî akhathè̆thî d́ŏ Krĭstu adèssègnè̆bòdò tòcò, kî agī nib́èplo dèdòdèthe d́ŏ alekă dèbwè gōjo;

² Tcaibò̄ Kib́ĭcè Athŏ d́ŏ thĭ klè̆ nu, tcaiŭi cè tè b́è d́ŏ dè hna no hnab́è acè̆ ńò, ḿî dèthagolō abu acab́ô̆ Kib́ĭcè adèthaèni ò dòkhò̆; tè b́è d́ŏ dèthaèni asôahlè̆ abu ńò,

³ ḿî d́ŏ dèthowîthamò abu nu; bè̄htajîbò̄ ḿè thĭ ne ḿè, ḿî lè̄bò̄ thotha dèmè̆ lò acab́ô̆ thŏ tòcò nu.

⁴ B́ĕ atcai thŏ tòcò Asaphra kò pòhta tapla nu, thĭ gī nib́èkò̆ dèdòdèthe akhocò̆ ada hwa za ńò dèdè̆ nu.

⁵ Gōnu akhò̆ thĭ htè athozethaze tòcò nu, òbò̄ adoabwe tòcò akălè̄. Thĭ lŏcăcè thòhtabò̄ dèmèpho ascid́ŏ htè ad́è̆lî̄ dèkhazô lōwa dèdè̆ nu, manè̄ d́ō, “Kib́ĭcè nô bija abè̄htahtô̆ ane tòcò nu kî Ci i abè̄b́ôla ane tòcò adèhludètă,” acè̆ nu.

⁶ Mègōnu d́ō, bè̄b́ôlabò̄ thĭ ne d́ŏ Kib́ĭcè acukhò akhodoădo abu nu, cab́ô̆htè Zè gè̄ bè̄htajîbò̄ thĭ d́ŏ dèdole akhî nu.

⁷ Hwĕla lŏbò̄ thĭ dèb́èhjŏ tòcò d́ŏ Cò ò nu manè̄ d́ō, Zè khwèi thĭ.

⁸ Òphôthèńèbò̄! Manè̄ d́ō, thĭ thè̆d́ĕd́ò Mod́èlî nu hè dîwî̄dewe acab́ô̆ glādo agèjè tod́ŏ awāhlè agū hjŭnīa bija akhò̆ nu.

⁹ Htòthèkhèbò̄ d́ŏ dèb́u ahmeaglo abu kî thîhè̆bò̄ htè thĭ thè̆buthè̆we aò d́ŏ Lākho thèd́è̆b́è tòcò ḿî ḿî khab́è dèssègnè̆ acab́ô̆ thĭ nu lò lò.

¹⁰ Ahluată lŏcăcè Ab́ĭcè htè ajogè wa d́ŏ dèdòdèthe alahtŭlablo d́ŏ Jezŭ Krĭstu abu dèbwè nu, Cè thè̆ne gè̄ mè pĕhtazòhta kî ki ikhoiăkò̆ wa b́ĕ wa kha hwă dèssègnè̆ tîkî nu.

¹¹ Zi htĭ Ze ge gō do thèjô̆ lahtŭlablo d́ò̆è! Amèn.

Dèhnŭsè Agudulă

¹² Je hweni thĭ cè kî thè̆lekôgè Cĭlas, jè thè̆buwe Krĭstupho adî̄ahma d́ŏ dèhtônāi kî dèkhathè̆thî aglobu htè ajo ḿî Kib́ĭcè adèhludètă athĕbwe nu. Sò̆htohmebò̄ d́ŏ abu nu.

¹³ Jî ṕîkò̆mo aò d́ŏ Babilŏniage ab́èrôplogè kî thĭ, hnŭsè le thĭ, kî jo phokhŏ Mărko ḿî ḿî mègè gōnu lò lò.

¹⁴ Hnŭsèhlèbò̄ lōwa kî Krĭstu adèb́èlò̄ dècwî tcahtĭ abu. Dècodèmò kè̄ b́è d́ò̆è thĭ d́ŏ aò Krĭstu abu tòcò nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan