Bìoball air-loidhne

1 Petru 3 - Geba Roman New Testament

Ahmè̆ tòcò kî Awa tòcò

¹ Acab́ô̆ gōnu akhò̆ ahmè̆ tòcò kò ò d́ò̆è za wa adèŭi alè̄, cab́ô̆htè atu b́u Kib́ĭcè alēahwè ńò hnò̆nu gī nib́è d́ò̆è dèb́u d́ŏ zè hmè̆ adègemeelô akhoacè̆ nu. Agò̄ do loba thāgò̆ thĭ jî̄b́è dôhmô̆ ńò nu.

² Manè̄ kòd́òdo dō, cè tòcò gā tcahtîkò̆ dèthowîthatcă kî dèb́èlò̄ dèthub́uthèb́è̆ htè aò thĭ bu nu.

³ Zi di cwini d́ò̆è za wa d́ŏ dèrawîramò ane d́ŏ dèhwikohwikò̆ d́ŏ dèhtôrô khulŭ, dèhnŭẃihnŭthòrò̆, dègrōdèb́ŭ kî hô̆b́e htè̆b́e tòcò nu ńò,

⁴ ḿî thĭ dèwîdèmò kè̄ b́è tcahtîkò̆ d́ŏ thĭ thotha adèb́îdèjū kî thĭ dèòzòlò abu, htè aḿî dèlīdobwîthè̆ d́ŏ Kib́ĭcè ahlò̆mò̄ nu dòkhò̆.

⁵ Hlĕ hlemo amihmu tcahtĭ asascĭi Kib́ĭcè tòcò rawîramògè ze ne gōnu, dòkhò̆b́è ḿî za khahô̆khajò za wa lò.

⁶ Sărah sòkhĕńe Abraham alē kî zo jo lōwa B́ĭcè. Thĭ d́è̆lî̄ thĭ ne zo phohmu b́ĕ thĭ mè dè ab́è kî di scisăni dè ad́îd́ăkaklè ale dimĭ ńò akhî nu.

⁷ Gōnu akhò̆ awa tòcò ḿî ḿî mèiaibò̄ ahmè̆, khwèibò̄ cè tòcò acab́ô̆ dèhtò̆dèla ahwè tòcò nu, kî bwè amò nib́èplo thĭ Kib́ĭcè adèò adèhludètă tòcò nu. Anu khaĺè thĭ dèthèb́è̆ kè tèb́èkò̆ dè ahnahnă ńò nu.

Dèkhassègnè̆ d́ŏ Dèmè Awîaè acè̆

⁸ Agudulă, lè̄bò̄ thotha dèmè̆ lò, thĭ dègomogamā domo lò. B́èlò̄thòklè̆ hlè lōwa, khòwèhmòb́è hlè lōwa, òi dèsalatha d́ŏ dèbwè dèbwè alè̄,

⁹ mège ḿè dèkholī d́ŏ dèkî̆kkè kî dèkî̆kkè ḿè, dèhô kî dèhô ḿè. Ḿî iscĭgebò̄ cè hôwîhômò dòkhò̆, manè̄ d́ō, dèhôwî ḿî Kib́ĭcè ŏlă aki i thĭ b́ĕ Zo jogè thĭ akhî nu.

¹⁰ Acab́ô̆ Cè Tcahtĭ d́ò; “Bija htè ab́èlò̄ dèò kî tcahtî muni awî dèbwè nu, gô̄ bôlab́i d́ò̆è akhè d́ŏ dèkî̆kkè aklè̆, kî zò lòmò kò òhlô̆òla d́ò̆è dèplèdèhlŭ.

¹¹ Ca ka d́aphlòḿĭ d́ò̆è ze ne d́ŏ dèkî̆kkè aklè̆, kî mè d́ò̆è dèwîdèb́è.

¹² Manè̄ kò̄ d́òdo dō, Kib́ĭcè agādŭ ḿî atcawè̄ bija adî̄ahma akho, Zi nigu ḿî asòkhĕńe lōwa adèthèb́è̆ lò, barasă Kib́ĭcè amūkă ḿî ad́aphlòḿĭ d́ŏ amè dèkî̆kkè tòcò ò nu,” akhoacè̆ nu.

¹³ Thĭ tho gô̄ sô tha gô̄ sô ma dèzwî̄dèè anikhĭ d́ō, bò̄bwè gè̄ mèbamèsè̆ za thĭ bwè?

¹⁴ Barasă thĭ gā khab́è b́eḿĕ dèdî̄dèhma anikhĭ dimimi d́ō, thĭ kè b́èhôwî tèpwè dòkhò̆. Mègōnu d́ō, scisăbò̄ ḿè bija dèbwè̆ ḿè, kî b́èhjŏb́èmabò̄ ḿè.

¹⁵ Ḿî òi dèd́ŏdèj́a Krĭstu d́ŏ thĭ thaobu nu. Ò prahnèsèhnèbò̄ thĭ ne cab́ô̆htè thĭ kò d́òscĭge bija dèbwè dèbwè adèhtôdèd́è̆ thĭ htè thĭ nib́è dèsascĭi awîakè̆ nu.

¹⁶ Mè nòthò̆ do hnò̆nu, mèbò̄ d́ŏ dèthob́îthajū kî dèscisă abu nu, htè d́ŏ dèthohlî̆thahlî̆ abu nu, cab́ô̆htè b́ĕ bija ad́òkè̆d́òô thĭ kî adòbijīla thĭ htè abò̄kô Krĭstu akă tòcò nu, kè̄ b́è thăwākò̆ nu.

¹⁷ Manè̄ kò̄ d́òdo dō, gè mè dè aè kî gô lôkô Kib́ĭcè adèthaèni acè̆ gā khab́è ḿî aè d́olĭkî gè mè dèkî̆kkè akhoacè̆ nu.

¹⁸ Manè̄ kò̄ d́òdo dō, Krĭstu thĭgè dè adîdî̄dahma ńò abu dèkhòwèpho anikhĭ cab́ô̆htè Ze gē leihŭbò̄ wa d́ŏ Kib́ĭcè ò nu.

¹⁹ Zè mèthĭ hwă phehî adèmè, Cè b́è leigè d́ŏ Spirito Tcahtĭ adèò abu nu kî thôithò̆igè aò dèkî̆dî̄ abu tòcò nu.

²⁰ Hlĕ aŭsu nu bija tòcò adèsòkhĕńe lēthèhô̆ tò ògè ńò, ḿî Kib́ĭcè khòthad́ò̆i cè tòcò htô̆do Nŏah prahta thè̆bò akhî nu. Ahlô̆hta aò d́ŏ thè̆bòbu ògè abwè lwīthô lò,

²¹ htè anib́ègè Dèŭsab́ăhtĭ tòcò ahô̆agèlè nu. Khŏnujo Dèŭsab́ăhtĭ mèhlô̆hta htŏ thĭ, tè b́è d́ŏ phehî ahwiahwa aklè̆ ńò, ḿî wa tha athîhè̆ d́è̆ aè htè dè awîab́è ŏlă Kib́ĭcè d́ŏ dèthomòthamò abu nu. Ajo ḿî dèmèhlô̆htage thĭ d́ŏ Jezŭ Krĭstu adèhtaboge dèthĭ aklè̆ nu.

²² Za sanălăò B́ĭcè Pa acudèhtwè kî agehta d́ŏ Mò̄kho cab́ô̆htè wi gī nib́èbò̄ dèila dèò lahtŭlablo dèbwè nu tcaiŭigè Mò̄khobwèzo lŏcăcè, Mò̄kho adècô̆dèthèlè̆, kî dèkhodèă lŏcăcè nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan