Bìoball air-loidhne

1 Kòrĭn 7 - Geba Roman New Testament

Dèd́è̆ Ab́èkja Dèphîcu

¹ Khŏnujo kò d́ò ma dèd́è̆ thĭ hwegè tòcò nu. Amikhŏ dèbwè do bōwè̄bāwè̄ amihmu alò ńò ḿî aè lò.

² Barasă phehî ḿî aòwe pĕhtakî dèb́èhjŏ lò d́ō, amikhŏ gŏ abwè kò òkô d́ò̆è ahmè̆ kî amihmu gŏ abwè kò òkô d́ò̆è awa.

³ Awa dèbwè gô̄ lôkô d́ò̆è ahmè̆ adèthaèni kî ahmè̆ dèbwè gô lôkô d́ò̆è awa adèthaèni.

⁴ Ahmè̆ da daguĭi dò̆ za anebî̆cè ńò, ḿî za wa d́ahò̆i cè dòkhò̆, gōnu akhò̆ awa da daguĭi dò̆ za anebî̆cè ńò, ḿî zè hmè̆ d́ahò̆i cè dòkhò̆.

⁵ D́ŏ dèlagla akhlŏ mèd́îd́ă hlèbò̄ ḿè lōwa akò̄ òbā ḿè. Agî̄ ḿî nòthò̆ dèlagla hnò̆nu, agî̄ ḿî d́ò̆è tod́odasa lò, cab́ô̆htè thĭ thub́uthèb́è̆ akhî kò ò nu. Mèhwă òploge lōwa, b́èkhè̆ Sătana gā hnakă thĭ d́ŏ thĭ dèkhodèă tò ò ńò aklè̆ nu.

⁶ Jò d́ò̆sa thĭ ajo ḿî dèikŏikja lò, tè b́è dèhmèla ńò.

⁷ Ja thaèni tèpwè bija gā la jè gŏ abwè lò, barasă bija dèbwè dèbwè ladū adènib́è Kib́ĭcè adèila ò ladŭ, dèbwè adènib́è ḿî domo, alewe dèbwè adènib́è ḿî d́ò̆ domo.

⁸ Ja thaè d́ò̆sa thĭ dè ahlò̆mò̄ tîkî be htè ab́èkja ahmugèmè kî aò b́òlò phôthè tòcò nu. Cò kò ò kèhta ahlò̆mò̄ acab́ô̆ jò ò khŏno ḿî dè aè dimi,

⁹ barasă co to kŏikhòi kèhta ma thwihtĭ adèda ńò d́ō, zò mò phîcu, manè̄ d́ō, gî̄ phîcu ḿî aè d́olĭkî kè̄ b́è dègodègè̄ assègnè̆ akhoacè̆ nu.

¹⁰ Ja thaè d́ò̆sa tèpwè bija aòkî pho òkî hmè̆ tòcò dimi, barasă tè b́è jò d́ò jè è̆ ńò, ḿî B́ĭcè aè̆ lò. Ahmè̆ tè hèbāb́è awa ńò.

¹¹ Zè gè̄ hèbā b́eḿĕ lōwa d́o, cò kò ò dèblè̄dòblò̄ b́è, ḿî̆diḿî ńò za gā laglageb́è za wa, awa dèbwè ḿî ḿî da hna hèphlòḿĭb́è ahmè̆ ńò ńò.

¹² Dè alewe ḿî jè dèd́ò̆sa, tè b́è aò d́ŏ Kib́ĭcè ò nu ńò, thè̆buwe dèbwè ahmè̆ gî̄ ḿî ma atu b́udè ńò, ḿî ca thaè akò òkô ca kă d́ō, za da hnahèkè̆b́è lōwa ńò.

¹³ Kî amihmu dèbwè awa ḿî atu b́udè ńò ḿî za ka thaè òkô lōwa akă d́ō, za da bāphlòḿĭb́è lōwa ńò.

¹⁴ Ajo ḿî awa adèb́u tò ò ńò dèbwè nu, d́ŏ zè hmè̆ acè̆ zî phî̆htagè bija ab́udè tòcò aklè̆ dèbwè, kîd́ò̆ ahmè̆ adèb́u tò ò ńò dèbwè ḿî ḿî d́ŏ za wa acè̆ zî phî̆htagè bija ab́udè tòcò aklè̆ dèbwè akhoacè̆ cè tòcò b́è lè̄dî̄lè̄hmagè. Dè gè̄ dè mè ma ane gōjo ńò nu d́ō, pholi tòcò tî plî̆ ta că tèpwè ńò. Khŏnujo cî plî̆ ca că htŏ.

¹⁵ Barasă adèb́u tò ò ńò dèbwè ko to ŏlă ma ńò d́ō, zo htobā za tèpwè ze ne tòcò. Dè gōjo tòcò nu, ab́udè amihmu ḿîwî amikhŏ ḿîwî tè b́è cŏglo tèpwè ńò. Kib́ĭcè jogè thĭ d́ŏ thĭ kò ò d́ŏ dècodèkhli abu nu.

¹⁶ Nî gî̄ ḿî ma ahmè̆ dèbwè d́ō, nè gè̄ mèhlô̆htageb́è na wa, kîd́ò̆ nî gî̄ ḿî ma awa dèbwè d́ō, nè gè̄ mèhlô̆htageb́è nè hmè̆.

Ò thôḿô̆ Cab́ô̆ B́ĭcè Jo Nè akhò̆

¹⁷ Alewe ḿî dèbwè ladū adènib́è d́ŏ Kib́ĭcè ò cab́ô̆htè Kib́ĭcè adèjo gō dohtîbò̄ cè nu. Ajo ḿî dèhtulahmèla ji ila d́ŏ Dèòplo lŏcăcè anikhĭ dèdè̆ nu.

¹⁸ Bija dèbwèbwè kè̄ b́è hô̆rîkî̆ hwă htŏ kî zî gî̄ phîni ma Kib́ĭcè adèjo d́ō, zò dò mò lè̄hu ńò, ḿî atè b́è hô̆rîkî̆ hnî̆ńò dèbwèbwè gî̄ phîni ma Kib́ĭcè adèjo d́ō, zò dò mò phîni b́è dèhô̆rîkî̆ ńò ńò.

¹⁹ Cè tè b́è hô̆rîkî̆ ńò ḿîwî, ab́èhô̆rîkî̆ ḿîwî ahtabohtab́ă tò ò tèpwè dimĭ ńò, ajwīamo ḿî cò òi Kib́ĭcè adèhmèla tòcò nu lò.

²⁰ Bija htè ab́èjo gŏ abwè mò mè adèmè aò cu cukhò bu tòcò acab́ô̆ aŭsu nu lò.

²¹ B́ĕ thĭ b́è jo akhî nu, thĭ gî̄ ḿî ma zôbwèpho d́ō, b́èhjŏb́èmabò̄ ḿè. Ḿî thĭ gī nib́è za ma dèb́ahlô̆ d́ō, phîbò̄ cè.

²² Zôbwè htè ab́èjo d́ŏ Kib́ĭcè ò dèbwè nu phî̆htagè Kib́ĭcè abwèòhlô̆òla kîd́ò̆ Kib́ĭcè abwèhlô̆ nib́ègè Kib́ĭcè adèjo agî̄ phî̆hta Krĭstu azôabwè.

²³ Thĭ b́è bwîge i htŏ alīabwî, ḿîbò̄ ḿè bija lewe azôabwè ḿè.

²⁴ Thè̆buwe tòcò, thĭ dèbwè dèbwè ladū, kò òb́è Kib́ĭcè ahlò̆mò̄ acab́ô̆ hlĕ cè b́èjogè athè̆lè̄kho nu.

Dèhtôdèd́è̆ Ab́èkja Adîphîhmè̆phîwa ńò kî Ahmugèmè tòcò

²⁵ Ab́èkja dèòladūlahwè tcahtĭ nu, ji di nib́è dèhmèla d́ŏ B́ĭcè ò dimĭ ńò, ḿî d́ŏ jè thè̆ne adèikŏikja abu, B́ĭcè adèkhòwèhmòb́è acè̆, òhmeòglo htŏ tèpwè.

²⁶ Mègōnu d́ō, b́ĕ dèotha akhî jo ḿî ab́ènibòni dòkhò̆, htè bija aèaò̆ dèbwè òbò̄ acab́ô̆ cò ò nènò nu.

²⁷ Nè kè̄ b́è cŏglo kî nè hmè̆ d́ō, wāhlèbò̄ ḿè akò òhlô̆òla ḿè. Ńò kò ò dèblè̄dòblò̄ d́ō, wāhlèbò̄ ḿè nè hmè̆ ḿè.

²⁸ Nî gî̄ phîpho phîhmè̆ d́ō, dèkhòwè tò ò tèpwè ńò, kî amihmu dèbwè gî̄ phîphophîwa ḿî ḿî dèkhòwè tò ò tèpwè ńò ńò. D́ŏ zè dèphîcu adèò abu nu, ze dèbadèsè̆ kò ò tèpwè lò lò, kî ja thaèni tèpwè thĭ gô̄ hlô̆htab́èbò̄ dèbadèsè̆ ajo nu.

²⁹ Thè̆buwe tòcò, ja thaè d́ò ḿî, akhî tò ò be ńò. Ahmè̆ ò tòcò kò òbò̄ acab́ô̆ bija ahmè̆ tò ò ńò nu,

³⁰ ajoaha tòcò kò òbò̄ acab́ô̆ dè mèjo mè ha acè̆ tò ò dimĭ ńò nu; aòmòòma tòcò òbò̄ acab́ô̆ dè amòthajè̄ tò ò dimĭ ńò nu; abwîasè̆ dè tòcò òbò̄ acab́ô̆ da dimĭ tò òni cè ńò nu;

³¹ bija amèai Lākho tèb́è jo tòcò atha gā ta j́ăwè̄ d́ò̆è alò ńò. Jò d́ò dè ajo manè̄, acab́ô̆ wî thîhè̆ adĕ nu, Lākho ajo tèb́è ḿî agò̄ tò ò lahtŭlablo ńò akhoacè̆ lò.

³² Ja thaèni thĭ òhlô̆òlakî dèb́èhjŏb́èma gŏmimi. Bija atò òkîpho òkî hmè̆ ńò dèbwè, ila kèhta ane Kib́ĭcè adèphîdèmè anikhĭ, kî ze mè b́ètha kèhta B́ĭcè.

³³ Ḿî aòkî pho òkî hmè̆ dèbwè nu, goigè̄ib́è Lākho adèphîdèmè kî mè b́èthab́è zè hmè̆ nu.

³⁴ Gōnu akhò̆ amihmu aòphôthè dèbwè nu, ci ila lŏ kèhta ze ne B́ĭcè anikhĭ, cò tò òkô̆sò̆b́è ńò ḿî akò òwîòtcă d́ŏ anebî̆cè anikhĭ lò. Amihmu aò kî pho ò kî wa dèbwè nu, gogè̄ ib́è Lākho adèphîdèmè kî mè b́èthab́è awa.

³⁵ Jò d́ò dè ajo ḿî agè̄ mèzo thĭ lò, tèb́è athagwăglo thĭ gò̄să ńò. Ḿî agè̄ mè ladîlase dè acab́ô̆ amò mè ò atherĕ nu kî agè̄ mèni thĭ aki ila ane lŏtholŏtha d́ŏ Kib́ĭcè ò nu.

³⁶ Bija dèbwè kò d́ò d́ò̆ thòrò̆ zo phomu dèbwè athabwela kî gī di niphoniwa za be ńò nu, zò mò mè da dimimi d́ō, zè ḿè d́ò̆è. Dèphîcu ajo dèdè̆ acè̆, zè dè mèni tèpwè dèkhòwè dimĭ ńò.

³⁷ Ḿî bija dèbwèbwè gè̄ bè̄hta atha kî ahnanohnabè cè tò ò ńò, ḿî d́ŏ ca tha lō lò zè gè̄ lè̄ ma zo phomu agô̄ lôkô zè dèthaèni d́ō, zè mè dè aè domo,

³⁸ Ḿî amikhŏ htè ati isani aphohmu awa ńò dèbwè mè dè aè d́okhlŏ dimi dòkhò̆.

³⁹ Za wa athathôḿô̆ we athŭtherĕ, ahmè̆ kè̄ b́è dècŏglo. Ḿî za wa gī thĭ d́ō, zî phîcu za bò̄bwè̆ lò htĕ ab́è ca tha nu, barasă agī ḿîb́è d́ŏ B́ĭcè abu nu lò.

⁴⁰ Jo gomo ḿî cò kò ò dò̆ ma d́ō, cò kò òmò d́okhlŏ lòmò̄! Kîd́ò̆ jo gomo ḿî ji nib́è tèpwè Kib́ĭcè atha.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan