Bìoball air-loidhne

1 Kòrĭn 15 - Geba Roman New Testament

Krĭstu Adèhtaboge Dèthĭklè̆

¹ Thè̆buthè̆we tòcò, ja thaè igomohtanige thĭ ab́èkja Vanzĕlō, htè jò d́ò̆htôlani thĭ nu. Kîd́ò̆ thĭ nib́ègè dèb́u ahmeaglo d́ŏ alò nu.

² Anu ḿî Vanzĕlō htè jò d́ò̆htôlanigè thĭ nu. Thĭ ku b́u Vanzĕlō jo kî phîhmeglo ma d́ō thĭ gī nib́è tèpwè dèmèhlô̆htage. Tî ḿî ma gōnu ńò d́ō, thĭ b́ugè ḿî ahnahnă lò.

³ Dè d́ŏ ji nib́ègè tòcò nu, ji ilage tècè̆ kòd́ò̆ thĭ htè ajwīdomodo gudŭ dimi ḿî Krĭstu thĭgè d́ŏ wè dèkhòwè acè̆, acab́ô̆ aò hwelagè d́ŏ Cè Tcahtĭ abu akhò̆ nu,

⁴ htè Cè b́è b́ŭlăgè kî acab́ô̆ Cè Tcahtĭ abu òhwelagè nu thŏthè̆ b́ahta d́ō Za htaboge dèthĭklè̆,

⁵ kî d́è̆lî̄hta Ze ne d́ŏ Petru, hwă alekă d́ŏ Thodŏpho scigībwè lō ahlò̆mò̄ nu.

⁶ Anu hwă alekă Cè d́è̆lî̄hta Ze ne taplakhă lò d́ŏ bōhmubicè abwè ò d́olĭ bija jè̄gèjè, kî bija ajo tòcò aklè̆ athĭ ògè tîkîtòkò̆, òè̆ tîkî ḿî bija aòthôḿô̆we tèpwè.

⁷ Hwă d́ō Cè d́è̆lî̄ we Ze ne Zăkomo, kî alekă nu Thodŏpho lŏcăcè lò.

⁸ Alekăgudŭ ḿî Cè d́è̆lî̄htakô ze ne kî jè, htè ală kî ḿî atò òla b́èsŏbèkhè̆ ńò dèbwè nu.

⁹ Manè̄ d́ō, d́ŏ bōhmubicè lŏcăcè aklè̆, jî ḿî ascipho lēdū lò. Ja da ta thagò̆ tèpwè bija jo jè Thodŏpho ńò. Manè̄ d́ō, jî ḿî alô mèssèngè̆gè Kib́ĭcè Adèòplo akhoacè̆ lò.

¹⁰ Nòthò̆ hnò̆nu, B́ĭcè adèhludètă acè̆ jî ḿîgè dè d́ŏ jî ḿî, kî ahluată htè Ci ilani jè nu dè kèhta tèpwè ahnahnă ńò, ḿî jè mèkèhta d́olĭ Thodŏpho alewe tòcò nu. Barasă tè b́è jè dèkhodèă hnèhnè ńò, ḿî B́ĭcè adèhludètă phîmè ploplo jè acè̆ lò.

¹¹ Mègōnu d́ō, jè ḿîwî, cè tòcò ḿîwî, ajo ḿî wa gŏ abwè d́ò̆htôla, kî thĭ b́ugè nu.

Wa Dèhtaboge

¹² Khŏnujo, wè dèd́ò̆sa thĭ ḿî Krĭstu htaboge dèthĭklè̆ awîakè̆ akhoacè̆, bija tòcò d́ò d́ŏ athĭ tòcò da htaboge za ńò ḿî d́ò̆ cadè̄?

¹³ Gî̄ ḿî ma gōnu d́ō, Krĭstu da htaboge za tèpwè ńò,

¹⁴ kî Krĭstu gā da htaboge ma dèthĭklè̆ ńò d́ō, wè dèd́ò̆htôla ḿî ahnahnă lò, kî thĭ dèb́u ḿî ahnahnă lò lò.

¹⁵ D́olĭ kî anu, akè d́è̆lî̄hta d́ŏ wî ḿî bija aplèahlŭdè, manè̄ wò d́ò̆htôlagè Kib́ĭcè mèhtaboge Krĭstu awîakè̆ akhoacè̆ nu. Athĭ tòcò da htaboge za dèthĭklè̆ ńò gî̄ ḿî ma adî̄ahma d́ō, Kib́ĭcè ti i mè Krĭstu htaboge dèthĭklè̆ ńò.

¹⁶ Manè̄, athĭ tòcò tè b́è mèhtaboge za dèthĭklè̆ ńò d́ō, Krĭstu tè b́è mèhtaboge za tèpwè ńò ńò.

¹⁷ Kî Krĭstu tè b́è mèhtaboge ńò d́ō, thĭ dèb́u ḿî akèḿègè, kî thĭ gā lapru hlè̆mè̄ we tèpwè d́ŏ thĭ dèkhòwè tòcò aklè̆ lò.

¹⁸ Ahtabohtab́ă ḿî bija ab́u Krĭstu htè athĭ hwăgè tòcò ḿî ḿî hlè̆mè̄ lōgè gè.

¹⁹ Wè dèsascĭi Krĭstu abu nu, gî̄ ḿî ma pwe dèòthôḿô̆ b́ĕ Lākho ajo dôzô lò kî agò̄ to dolĭ ma ajo ńo nu, wò mò nib́è dèthakhòwè d́olĭ kî bija alewe aò Lākho thèd́è̆b́è nu.

²⁰ Barasă adî̄ahma ḿî Krĭstu htabogegè d́ŏ dèthĭklè̆, anu ḿî thè̆thî htè bija asòḿĭ dèthĭ abu tòcò kè̄ b́è b́awè̄htogekò̆ nu.

²¹ Manè̄ d́ō, acab́ô̆ dèthĭ òhtakî bija dèbwè akhò̆ nu, d́ŏ klè tòb́ò̆ lò abu, dèhtaboge d́ŏ dèthĭ òhtakô kî bija dèbwè lò.

²² Acab́ô̆ bija gŏ abwè thĭgè d́ŏ dèlè̄plo ane kî Adam nu, d́ŏ klè tòb́ò̆ lò abu, bija gŏ abwè gā htaboge d́ŏ dèthĭklè̆ d́ŏ dèlè̄plo ane kî Krĭstu nu lò.

²³ Barasă d́ō, bija dèbwè kî dèbwè kè̄ b́è mèhtaboge kî aweakŭ ab́èabò; aŭsugudŭ, Krĭstu, anu hwă alekă, b́ĕ Zè dèlela akhî nu, bija htè ab́èkja Cè tòcò gā htabogekò̆.

²⁴ Anu Hwă d́ō, dè akŭdu gō dokò̆. Krĭstu gè̄ mènomèbèkò̆ dèŭitcai ab́èkja thotha tòcò, anicô̆nithèlè̆ tòcò, aŭitcai htĭge tòcò lŏcăcè, kî Ci kî ilagekò̆ Htĭge d́ŏ Pa B́ĭcè acukhòbu lò.

²⁵ Manè̄ d́ō, Krĭstu ku ŭikò̆ htô̆ dola d́ŏ B́ĭcè mènomèbè d́ĕd́ò tòcò lŏcăcè, kî b́è̆lă cè tòcò d́ŏ lōwa akhajāla alè̄ nu.

²⁶ D́ĕd́ò htè ab́è dèmènomèbè akŭdulă gî̄ ḿîkò̆ dèthĭ.

²⁷ Manè̄, dèhwela ògè, “B́ĭcè b́è̆lă dèlŏcăcè d́ŏ Za khajāla alè̄ lò,” ad́ògè do. Ahlî̆hta tèpwè d́ŏ Kib́ĭcè thè̆ne htè alè̄la dèlŏcăcè d́ŏ Krĭstu akhajāla alè̄ dèbwè dî ḿî “dèlŏcăcè” aklè̆ nu ńò.

²⁸ Barasă b́ĕ dèlŏcăcè b́è b́è̆lăgè d́ŏ Krĭstu akhajāla alè̄ nu, Cè, Pho thè̆ne, kò òkò̆ d́ŏ Kib́ĭcè htè ab́è̆lă dèlŏcăcè zè lè̄ dèbwè alè̄ nu nu, kî Kib́ĭcè ku ŭi lŏkliklikò̆ dèlŏcăcè nu.

²⁹ Khŏnujo, bija Aŭsab́ăhtĭ d́ŏ athĭ htŏ anikhĭ tòcò nu gî̄ ḿîbò̄ danè̄? Cè tòcò sascĭi da anikhĭ nè? B́eḿĕ athĭ tòcò da htaboge ńò, acab́ô̆ bija tòcò cò d́ò nu akè b́è ma d́ō, b́è manè̄ bija aŭsab́ă ma htĭ d́ŏ athĭ htŏ tòcò anikhĭ nè?

³⁰ Kîd́ò̆ wa nu, wè kèhtîb́è ma dèb́èhjŏb́èma scisăthabo gŏ akhînare nè?

³¹ Thè̆buthè̆we tòcò, jè kèhtîb́è dèthĭ kô̆ lumu ani lò! Jî phîdophîmugè je ne d́ŏ thĭ kho thĭ cè̆, kî jò òplosò̆jīgè thĭ d́ŏ Jezŭ Krĭstu wî B́ĭcè abu akhoacè̆ jò d́ògè dè ajo tòcò nu.

³² Acab́ô̆ dè mè ane akhò̆, jî ḿî htadohtara “dèphodèwe akhŭahè̆,” htè aò Ephè̆sus abu b́ĕjo tòcò d́ō, d́ŏ bija adètcahtî abu ji nikhĭ ahluată kò òbò̄ ā? Ḿî bija athĭ tòcò gī di nib́è dèhtaboge ńò d́ō, acab́ô̆ dèd́ò ò, “A kha, ò̆ kha. Manè̄ mòbĕ dini wi gī thĭ b́ègè lò.”

³³ Ibò̄ ḿè dèhlòniṕlèni thĭ ḿè. “Khò̆khè dî wî ńò d́ō bija awî tòcò gè̄ kè̆ kô ôkô za ca kă lò.”

³⁴ Khwè̆b́age thĭ ne d́ŏ dèthîhè̆ ab́èabò ò, kî sò̆tab́abò̄ dèkî̆kkèmèhlò̆ aklèthòò̆ tòcò nu. Thĭ gā thăwābò̄ anikhĭ jò d́ò̆sagè htè thĭ tòcò cò ḿî bija dî thîhè̆ Kib́ĭcè ńò nu.

Dèhtaboge Anebî̆cè

³⁵ Bija dèbwè kè d́è̆ thĭ, “Bija athĭgè nu gè̄ wè̄hto htaboge d́ò̆ cadè̄? Zî neb́î̆cè gè mèbò̄ ane cadè̄?”

³⁶ Bija atitŏorŏ tòcò, dèkhwĭ ab́èsola nu atè kè̆ tô ô ŭsu ma ńò d́ō atè thè̆mè̄hta za tèpwè ńò.

³⁷ Kî dè htè no sola nu ḿî dèkhwĭ aphlo lò. Bètèb́èńò gî̄ ḿî b́ukală aphlo ḿî̆dîḿî ńò b́u alewe domomo aphlo lò. Tè b́è b́u amu htè alekă akò d́òhta nu ńò.

³⁸ Kib́ĭcè i dèkhwĭ aphlo anu anebî̆cè domo domo aè̆ acab́ô̆ Ca thaè i adĕ lò.

³⁹ Kî dèthôḿô̆ tòcò apheahî dî ḿî dèphedèhî domo lò ńò. Bija apheahî ḿî domo, dèphodèwe tòcò apheahî ḿî domo, htŏphojōli tòcò è̆ domo kî d́îphodāpho è̆ ḿî domo lò.

⁴⁰ Kî dèneb́î̆cè ab́èkja Mò̄kho kî dèneb́î̆cè ab́èkja Lākho ò ò. Barasă d́ō, Mò̄kho anebî̆cè ahĭahtè̆ ḿî domo kî Lākho anebî̆cè ahĭahtè̆ ḿî alewe domo lò.

⁴¹ Lumu anebî̆cè ahĭahtè̆ ḿî domo, Hlè̆ anebî̆cè ahĭahtè̆ ḿî alewe domo kî sè dèmè̆ dèmè̆ ò kî anebî̆cè ahĭahtè̆ d́è̆ è̆ ladū lò.

⁴² Athĭ tòcò b́è b́awè̄htoge ḿî gōnu lò lò. Anebî̆cè b́è b́ŭlă acab́ô̆ athĭgè nu, kî athôḿô̆htage acab́ô̆ adi thĭ za ńò nu.

⁴³ B́ĕ ab́èsola b́ŭlă akhî nu azizòmòthŏ kî akhozeăze, b́ĕ ab́èb́awè̄htoge nu, apĕhta kî ahĭahtè̆ kî dèkhodèă lò.

⁴⁴ Ab́è b́ŭlă acab́ô̆ dèneb́î̆cè kî ab́èb́awè̄htoge acab́ô̆ dètha nu. Acab́ô̆ dèneb́î̆cè ò akhò̆ nu dètha kè̄ b́è òkô lò.

⁴⁵ Manè̄ d́ō, Cè Tcahtĭ d́ò, “Bija akhahtî dèbwè htè Adam nu b́è b́òla acab́ô̆ dèò anebî̆cè,” ḿî Adam akŭdulă dèbwè nu b́è b́òla acab́ô̆ tha ai dèthôḿô̆ nu lò.

⁴⁶ Tè b́è dètha le ŭsu ńò, ḿî dèneb́î̆cè ŭsu hwă khaĺè dètha òhtakò̆.

⁴⁷ Adam akhahtî dèbwè nu b́è b́òlai haphĭhmu, zî ḿî Lākho lò. Adam gībwè dèbwè ḿî aò d́ŏ Mò̄kho ala htè B́ĭcè nu.

⁴⁸ Bija ab́èb́òlai Lākho tòcò nu ḿî bija ab́èkja Lākho, ḿî bija ab́èkja Mò̄kho tòcò nu lă kî bija dèbwè htè aò Mò̄kho alela nu.

⁴⁹ Acab́ô̆ wô kô̆htathòhta bija htè ab́èb́òlai Lākho dèbwè ajòaja akhò̆ nu, wô gô̄ kô̆htathòhta Bija d́ŏ aò Mò̄kho ala dèbwè ajòaja lò.

⁵⁰ Thè̆buwe tòcò, ja thaè d́ò ḿî dè htè ab́èb́òlai thwihtĭ phehî nu di nib́è za B́ĭcè Ahtĭage ńò. Kî dè htè athŏaô̆ za nu, di nib́è za dè to thŏ tô ô̆ ńò.

^51-52 Sòkhĕńebò̄ dèdî̄dèhma adèòhuòb́i ajo; wi di thĭ b́è gŏ abwè ńò, barasă b́ĕ khaja alē thèhta alekăgudŭ nu, wè kè̄ b́è dèd́ò̆khlè wa taplakhă d́ŏ tod́opho adābu, plăhlèkwè acab́ô̆ bija phlasci agādŭ akhò̆ nu lò. Manè̄ d́o, b́ĕ khaja alē thèhta nu bija athĭgè tòcò kè̄ b́è dèb́awè̄htoge, di thĭ b́è be takhă ńò, kî wa kè̄ b́è dèb́ăkhlèkè̆ gŏ abwè lò.

⁵³ Manè̄ d́ō, dè htè athŏaô̆ za nu kò kô̆htathòhta dè to thŏ tô ô̆ za ńò, dè athĭ za nu kô kô̆htathòhta dè adi thĭ za ńò lò.

⁵⁴ Mègōnu d́ō, b́ĕ dè athĭ za kô̆htathòhta hwăgè dè adi thĭ za ńò, kî dè akè̆aô za kô̆htathòhta hwăgè dè atè kè̆ tô ô za ńò nu, anu tapla dèhwela gē pĕhtazòhtakò̆ htè; “Dèthĭ b́è mèkè̆mèô htŏ, dèmènomèbè pĕhtazòhta htŏ.”

⁵⁵ “Ŏ dèthĭ, nè dèmènomèbè ò d́òlè̄? Ŏ dèthĭ, nò thô̆thè̆mè̄ ò d́òlè̄?”

⁵⁶ Dèthĭ acô̆thèlè̆ ḿî dèkhòwè, kî dèkhòwè acô̆thèlè̆ ḿî dèthôdèthò̆ lò.

⁵⁷ Barasă d́ō thîhè̆htagebò̄ Kib́ĭcè htè ai dèmènomèbè d́ŏ B́ĭcè Jezŭ Krĭstu acè̆ nu.

⁵⁸ Mègōnu d́ō, b́èlò̄ thè̆buthè̆we tòcò, sò̆hto òhmeòglobò̄. Ḿî thĭ thîhè̆ htè thĭ mè Kib́ĭcè adèmè nu di ḿî dè ahnahnă hnahnă ńò d́ō mèthĕbwethîlî̆ thèjô̆bò̄.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan