Tuturigana 5 - Ghari

Igira na Kukuana a Adam

¹ Iani e vaga na mamareqira igira na kukuana a Adam. Kalina God e aqosigira na tinoni, maia e aqosigira tana nununa segeni.

² Aia e aqosigira na manena ma na dakina, me tabugira me soaginigira “Tinoni.”

³ Mi kalina a Adam e tsaulia 130 ngalitupana aia e tamanina goto kesa na dalena mane maia e usuli saikesalia na tamana, me soaginia a Set.

⁴ Mi murina ia, ma Adam e mauri goto 800 na ngalitupa. Maia e tamanina goto visana na dalena i muri,

⁵ me mate kalina e 930 ngalitupana.

⁶ Mi kalina a Set e 105 ngalitupana, maia e tamanina kesa na dalena mane, me soaginia a Enos,

⁷ mi muri maia e mauri goto 807 ngalitupa. Maia e tamanigotoa visana na dalena,

⁸ me mate kalina e 912 ngalitupana.

⁹ Mi kalina a Enos e 90 ngalitupana, maia e tamanina kesa na dalena mane, a Kenan na soana,

¹⁰ mi muri, maia e mauri goto 815 ngalitupa. Maia e tamanigotoa visana na dalena,

¹¹ me mate kalina e 905 ngalitupana.

¹² Mi kalina a Kenan e 70 ngalitupana, maia e tamanina kesa na dalena mane, a Mahalalel na soana,

¹³ mi muri, maia e mauri goto 840 ngalitupa. Maia e tamanigotoa visana na dalena,

¹⁴ me mate kalina e 910 ngalitupana.

¹⁵ Mi kalina a Mahalalel e 65 ngalitupana, maia e tamanina kesa na dalena mane, a Jared na soana,

¹⁶ mi muri, maia e mauri goto 830 ngalitupa. Maia e tamanigotoa visana na dalena,

¹⁷ me mate kalina e 895 ngalitupana.

¹⁸ Mi kalina a Jared e 162 ngalitupana, maia e tamanina kesa na dalena mane, a Enok na soana,

¹⁹ mi muri, maia e mauri goto 800 na ngalitupa. Maia e tamanigotoa visana na dalena,

²⁰ me mate kalina e 962 ngalitupana.

²¹ Mi kalina a Enok e 65 ngalitupana, maia e tamanina kesa na dalena mane, a Metusela na soana.

²² Mi murina ia, ma Enok e mauripata dou kolua God i laona 300 na ngalitupa me tamanigotoa visana na dalena.

²³ Maia e mauri tsaulia 365 na ngalitupana.

²⁴ Mi tana maurina popono, aia e mauripata dou kolua God, mi muri maia e tavongani nanga lê, rongona God nogo e adiligia tania na barangengo.

²⁵ Mi kalina a Metusela e 187 ngalitupana, maia e tamanina kesa na dalena mane, a Lamek na soana,

²⁶ mi muri, me mauri goto 782 na ngalitupa. Maia e tamanigotoa visana na dalena,

²⁷ me mate kalina e 969 ngalitupana.

²⁸ Mi kalina a Lamek e 182 ngalitupana, maia e tamanina kesa na dalena mane,

²⁹ me tsaria, “Na baka iani sauba ke tabegita me ke gini malamala vanigita pipi nida aqo kakai tana kao aia na Taovia e ketsonogoa”; me vaga ia, maia e soaginia a Noa.

³⁰ Ma Lamek e mauri goto 595 na ngalitupa. Maia e tamanigotoa visana na dalena,

³¹ me mate kalina e 777 ngalitupana.

³² Mi muri, kalina e 500 nogo na ngalitupana a Noa, maia e tamanitugira tolu na dalena mane, a Sem, ma Ham ma Japet.