Tsoko Tinoni 1 - Ghari

Na Kesanina na Tsoko Tinoni Ara Nauvanigira na Israel

¹ Tana kesanina dani tana rukanina vula i laona na rukanina ngalitupa i murina kalina igira na tinoni ni Israel ara mololea i Ejipt, ma na Taovia e goko vania a Moses i laona nina Valepolo Tabu, tana kaomate ni Sinai. Maia e tsari vaganana vania,

² “Igoe ma Aaron, kagamu kamu ka aqosia ke kesa na tsoko tinoni i laoqira na toga ni Israel, murigira na duli ma na vungu. Kamu ka maretsunagira na soaqira pipi sui na mane

³ ara tsaulia e rukapatu na ngalitupaqira me liusia, igira e tugugira nogo na sangasage tana alaala na mane vaumate.

⁴ Ma kamu ka vilia ke kesa na taoviana na duli ke talumai i laona pipi na puku ma kara sangakagamu.”

^5-16 Migirani nogo na soaqira na mane ara viligira kara sangakaira a Moses ma Aaron na nauana na aqo iani: tana puku konina a Ruben ara vilia a Elisur na dalena a Sedeur; tana puku konina a Simeon ara vilia a Selumiel na dalena a Surisadai; tana puku konina a Juda ara vilia a Nason na dalena a Aminadab; tana puku konina a Isakar ara vilia a Netanel na dalena a Suar; tana puku konina a Sebulun ara vilia a Eliab na dalena a Helon; tana puku konina a Epraim ara vilia a Elisama na dalena a Amihud; tana puku konina a Manase ara vilia a Gamaliel na dalena a Pedasur; tana puku konina a Benjamin ara vilia a Abidan na dalena a Gideoni; tana puku konina a Dan ara vilia a Ahieser na dalena a Amisadai; tana puku konina a Aser ara vilia a Pagiel na dalena a Okran; tana puku konina a Gad ara vilia a Eliasap na dalena a Deuel; tana puku konina a Naptali ara vilia a Ahira na dalena a Enan.

¹⁷ Tugira sangavulu ruka na mane girani ara tu sangakaira a Moses ma Aaron

¹⁸ na soasaiaqira sui lakalaka na saikolu popono tana kesanina dani tana rukanina vula, mara maretsunagira na soaqira na tinoni sui lakalaka muri duli ma na vungu. Ara tsokosaia mara maretsunâ na soaqira pipi sui lakalaka na mane ara tsaulia rukapatu na ngalitupaqira me liusia,

¹⁹ vaga nogo na Taovia e moloketsana vanigira. A Moses e maresoaqira na tinoni tana kaomate ni Sinai.

^20-45 Migira na mane e rukapatu na ngalitupaqira me liusia, igira e tugugira kara sangasage tana alaala na mane vaumate ara maretsuna na soaqira muri duli ma na vungu, tuturiga tana puku konina a Ruben aia na idana dalena a Jakob. Ma na dangaqira e vaga iani: tana puku konina a Ruben ara 46,500 mane; tana puku konina a Simeon ara 59,300 mane; tana puku konina a Gad ara 45,650 mane; tana puku konina a Juda ara 74,600 mane; tana puku konina a Isakar ara 54,400 mane; tana puku konina a Sebulun ara 57,400 mane; tana puku konina a Epraim ara 40,500 mane; tana puku konina a Manase ara 32,200 mane; tana puku konina a Benjamin ara 35,400 mane; tana puku konina a Dan ara 62,700 mane; tana puku konina a Aser ara 41,500 mane; mi tana puku konina a Naptali ara 53,400 mane.

⁴⁶ Migira sui saisai na mane e rukapatu na ngalitupaqira me liusia ara 603,550.

⁴⁷ Migira moa na Levite ara tau maresoaqira kolugira na puku tavosi,

⁴⁸ rongona na Taovia e tsarinogoa vania a Moses,

⁴⁹ “Kalina igoe ko tû na maresoaqira na mane e tugugira nogo na sage tana alaala na mane vaumate, mo ko laka moa na maresai koluaqira igira na mane tana duli konina a Levi.

⁵⁰ Ma nimu aqo ko molovanigira na Levite kara reitutugua na Valepolo i tana au totu inau, ma na vangana sui i laona. Igira nogo kara kalagaia kolu vangana sui ma kara naua niqira aqo tabu i laona, ma kara vaturikaegira niqira valepolo polipolia.

⁵¹ Me pipi kalina ti vaga igamu kamu tû na vano kesa tana nauna segeni, migira nogo na Levite niqira aqo kara veoa na Valepolo Tabu, ma kara ba vaturikae tugua i tana sauba kamu ba totu. Masei tinoni tavosi ti ke ba liu varangisia na Valepolo Tabu ia, nimui aqo kamu labumatesia.

⁵² Migira na tinoni ni Israel kara vaturikaea niqira valepolo muritaoninogoa niqira duli babâ, me pipi ma mane tana nina alaala segeni, mi vavana na pulaqena nina duli segeni.

⁵³ Migira na Levite kara vaturikaegira niqira valepolo polipolia na Valepolo Tabu ma kara vangataoa, rongona ke gini tau goto mai varangisia ke kesa, me ke gini tsaia na korequ, ma kau redogira na saikolu popono ni Israel.”

⁵⁴ Me vaga ia, migira na toga sui ni Israel ara naugira pipi sui na omea na Taovia e raiginia a Moses.