Mateo 1 - Ghari

Na Soaqira Babaa Igira na Mumuana A Iesu Kristo

¹ Iani nogo e vaga na mamarena na soaqira babaa igira na mumuana a Iesu Kristo, aia na kukuana a David, ma David aia na kukuana a Abraham.

² E tuu i konina a Abraham, me tsau baa i konina a David na Taovia Tsapakae, ara tsokosaigira na kamaga vaga iani: A Abraham na tamana a Isaak; a Isaak na tamana a Jakob; a Jakob na tamana a Juda mi tugira na tamatasi;

³ a Juda ka tamaqira a Peres ma Sera, ma ko Tamar ka tinaqira; a Peres na tamana a Hesron; a Hesron na tamana a Ram;

⁴ a Ram na tamana a Aminadab; a Aminadab na tamana a Nason; a Nason na tamana a Salmon;

⁵ a Salmon na tamana a Boas, ma ko Reab na tinana a Boas; a Boas na tamana a Obed, ma ko Rut na tinana a Obed; a Obed na tamana a Jese;

⁶ ma Jese na tamana a David na Taovia Tsapakae. Me tumai i konina a David, me tsau baa tana tagu igira na toga ni Israel ara tsinogo vano i Babilon, ara tsokosaigira na kamaga vaga iani: a David na tamana a Solomon, ma na tinana a Solomon, aia nogo na savana a Uria tana idana;

⁷ a Solomon na tamana a Rehoboam; a Rehoboam na tamana a Abija; a Abija na tamana a Asa;

⁸ a Asa na tamana a Jehosapat; a Jehosapat na tamana a Jehoram; a Jehoram na tamana a Usia;

⁹ a Usia na tamana a Jotam; a Jotam na tamana a Ahas; a Ahas na tamana a Hesekia;

¹⁰ a Hesekia na tamana a Manase; a Manase na tamana a Amon; a Amon na tamana a Josia;

¹¹ a Josia na tamana a Jehoiatsin ma tugira na tasina.

¹² Me tuu i murina kalina igira na Israel ara tsinogo vano i Babilon, me tsau baa tana botsana a Iesu, na kamaqira ara tsokogira vaga iani: a Jehoiatsin na tamana a Sealtiel; a Sealtiel na tamana a Serubabel;

¹³ a Serubabel na tamana a Abiud; a Abiud na tamana a Eliakim; a Eliakim na tamana a Asor;

¹⁴ a Asor na tamana a Sadok; a Sadok na tamana a Akim; a Akim na tamana a Eliud;

¹⁵ a Eliud na tamana a Eleasar; a Eleasar na tamana a Matan; a Matan na tamana a Jakob;

¹⁶ ma Jakob na tamana a Iosepo, aia na tauna ko Maria, ma ko Maria na tinana a Iesu aia ara soaginia na Mesia.

¹⁷ Me vaga ia, mara sangavulu vati na vatavata, tuu i konina a Abraham, me tsau baa i konina a David. Mara sangavulu vati na vatavata tuu i konina a David, me tsau baa tana tagu igira na tinoni ara tsinogo vano i Babilon. Mara sangavulu vati goto na vatavata e tuu i tana, me tsau baa kalina e botsa na Mesia.

Na Botsana a Iesu Kristo

¹⁸ Iani nogo e vaga na turupatuna tana rongona na botsana a Iesu Kristo. Ko Maria, aia na tinana a Iesu, ara anevaninogoa e kesa na mane, a Iosepo na asana. Mi kalina ara ka tau vati tauga moa, ma ko Maria e donagadovia laka e tiana nogo ginia na Tarunga Tabu.

¹⁹ Ma Iosepo, aia na mane dou, me goto nina sasaga, me tau moa ngaoa laka ke tangiseko na asana ko Maria i mataqira na toga. Te e pada moa i tobana laka ke veoa na vaianegi, me ke mololedodoa moa ko Maria.

²⁰ Mi kalina aia e papada vaganana moa ia, me kesa nina angelo na Taovia e laba vania tana maturu me tsarivania, “A Iosepo igoe na kukuana a David, ko laka na matagu na adiana ko Maria me ke lia na taumu. Rongona na baka e totu i tobana ia, aia na Tarunga Tabu nogo e tianaginia.

²¹ Me sauba ke vasua kesa na dalena mane, migoe ko soaginia a Iesu, (ma na rongona na soa ia ‘Vagamauri’), rongona aia nogoria sauba ke maurisigira nina tinoni tania niqira sasi.”

²² Eo, ara gini laba na omea sui vaga gira, tana rongona nogo kara gini manatovu na omea na Taovia e tsaria i sau, mara katevulagimaia igira na propete kalina ara tsaria na goko vaga iani,

²³ “E kesa na siama sauba aia ke tiana, me ke vasua kesa na dalena mane, me ke soaginia a Emanuel.” Ma na rongona na soa ia, ‘God e totu i konida’.

²⁴ Mi kalina e mamata a Iosepo, maia e muria moa na omea vaga nogo na angelo e tsarivania, me adia ko Maria me lia na tauna.

²⁵ Maia e tau goto maturusai kolua. Mi kalina ko Maria e vasua na dalena mane, ma Iosepo e soaginia a Iesu.