Linge 97 - Ghari

God Aia na Tagao Loki Tsapakae

¹ !Na Taovia e taovia tsapakae! !Igoe na barangengo ko gini magemage! !Migamu goto na momoru sui ni tasi kamu mage loki!

² Na parako ma na rodo ara polipolia; maia e tagaovigira na tinoni sui tana gotolaka ma na manana.

³ Na lake iruiru e idaida vania, me iruvigira sui gana gala ara totu polipolia aia.

⁴ Nina angaanga e mararasi poponoa na barangengo; ma na barangengo e reia me gariri loki.

⁵ Migira na vungavunga ara rono lê vaga moa na kadele kalina e iru, i matana na Taovia aia e tagaovia na barangengo popono.

⁶ Na baragata e katevulagia laka aia e gotolaka saikesa, migira sui na puku na tinoni ara reivulagia gana loki tsapakae.

⁷ Migira sui ara samasama vanigira na god peropero kara paluvangamaqira lê; rongona igira sui na god tavosi ara palatsuna i matana na Taovia mara tsuporu vania.

⁸ Igira na tinoni ni Sion ara gini magemage, migira sui na verabau tana Juda ara gini mage loki sosongo tana rongoqira nimu pedegoto igoe Taovia.

⁹ Taovia Susuliga Sosongo, igoe nogo o tagaovi kaputia na barangengo popono; migoe o loki liusigira bâ pipi sui na god tavosi.

¹⁰ Na Taovia e galuvegira igira ara reisavia na sasaga seko; maia e reitutugudoua na mauriqira nina tinoni; me laumaurisigira tania na susuligaqira na tinoni vanga tsutsukibo.

¹¹ Na marara e mararasigira na tinoni dou, ma na magemage e dangaligira igira e goto niqira sasaga.

¹² !Kamu mage igamu sui amu totugoto i matana na Taovia, kamu padatugua na omea sui aia e naugira, ma kamu soadoua na asana tabu!