Linge 77 - Ghari

Na Ngangaidato Vania God Tana Tagu na Rota

¹ Inau au ngangaidato vania God; au ngangaidato maia e rongomiau.

² I laona niqu rota, minau au nongia na Taovia; mi tana bongi popono au abedatoa na limaqu tana nonginongi, me tagara sa omea tangomana ke vereau.

³ Mi kalina inau au padâ God, mau ngangai i laona na tobaqu; mi kalina au totu mui mau papada, me ponopala lê na tobaqu.

⁴ Aia e tongovaniau na maturu mau mamata moa na bongi popono; au padasavi sosongo me gini utugana vaniau na goko.

⁵ Au padavisugira na tagu ni sau mau padavisugira goto na ngalitupa ara putsi oka nogo.

⁶ Tana bongi popono au totu tû moa mau papada sosongo; au totu mui mau papada mau veisua segeniqu vaga iani:

⁷ “?Laka sauba nomoa na Taovia ke sove tanigita saviliu? ?Me laka sauba e utu saikesa ke reingaogita tugua?

⁸ ?Laka aia e tau nogo galuvegita? ?Me laka e tau nogo ngaoa na manaliana nina veke e naua vanigita?

⁹ ?Me laka God e padalenogoa na saugaluve vaniada? ?Me laka nina kore e oligininogoa na aqona nina galuve?”

¹⁰ Mi muri minau au tsaria, “Ma na omea inau au gini rota loki bâ na padaana e vaga iani: laka God e tau nogo susuliga.”

¹¹ Taovia, sauba kau padatugugira nimu aqo loki igoe o naugira nogo; me sauba kau padavisugira na omea loki ganataga sui igoe o aqosigira nogo i sau.

¹² Sauba kau papada tana rongoqira pipi sui lakalaka na omea igoe o naugira; sauba kau totu mui ma kau padatugugira pipi nimu aqo loki sui.

¹³ Pipi na omea igoe God o naugira ara tabu sui. Me tagara goto sa god ke loki atsa kolugo igoe.

¹⁴ Igoe nogo na God o aqosigira na valatsatsa; mo sauvulagia gamu susuliga i laoqira na puku na tinoni sui.

¹⁵ Tana susuligamu loki nogo igoe o laumaurisigira nimu tinoni, igira nogo ka kukuaqira kaira a Jakob ma Josep.

¹⁶ Kalina igira na ko loki ara reigo igoe God, migira ara matagu sosongo, ma na maorodo na tasi e gariri tana matagu.

¹⁷ Migira na parako ara tumuli tsunamaia na usa; ma na quluqulu e poda tana masaoka, ma na angaanga e kirapi me liu pipi nauna.

¹⁸ Ma na maququna nimu quluqulu e liu ao sosongo, ma na kirapina na angaanga e angavi poponoa na barangengo; me kakanu na barangengo popono.

¹⁹ Igoe o liu tsapatugu i laona na panu; mo savu bâ i laona na maorodo na tasi me tau tangomana kesa ke reia na maleamu.

²⁰ Migoe o tudumigira nimu tinoni toga vaga nogo e kesa e reitutugudougira nina sipi, mo molokaira a Moses ma Aaron kara ka ida vanigira.