Linge 76 - Ghari

Na Linge na Tsonikaeana God Tana Rongona e Managana

¹ Igira ara totu tana vera ni Juda igira ara donaginia God. Ma na asana e tangiloki tana Israel popono.

² Maia e tamanina na verana i Jerusalem; me totu i gotu tana Vungavunga Sion.

³ Mi tana nogo e bokua niqira parige igira na gala, ma niqira tako ma niqira isi, eo, me pipi sui goto niqira omea levolevo gana na vailabu.

⁴ !God, igoe o loki tsapakae sosongo! Me tangiloki na rongomu kalina igoe o labavisumai talu tana vungavunga i tana igoe o tuliusigira gamu gala.

⁵ Mo lauligia tanigira niqira mane vaumate susuliga pipi niqira omea levelevo ara laua tana vailabu, mi kalina ia, migira sui ara mate pitsu sui nogo, me puala lê sui gaqira susuliga.

⁶ Mi kalina igoe nina God a Jakob o tû mo goraragira, migira sui niqira ose kolugira ara sage koniqira ara viri puka mara mate lê sui.

⁷ Migoe moa Taovia igira na tinoni sui ara kukuni tanigo sosongo. Mi kalina igoe o kore loki me tau goto tangomana kesa ke baria.

⁸ Tû i gotu i baragata igoe o sauvulagia nimu pedegoto vanigira na tinoni sui. Ma na barangengo e gini matagu loki sosongo me totu mui lê,

⁹ kalina igoe o tû na vota makaliana na gokona nimu pedegoto, ma na maurisiaqira igira ara bingi sekoligira ieni i barangengo.

¹⁰ Niqira momosatoba nogo igira gamu gala e tsukilâ, te ara gini tsonikaego igira nimu tinoni; migira moa ara tau mate tana vailabu sauba kara lokisigira nimu dani tabu igoe.

¹¹ Tusuvania na Taovia nimui God na omea igamu amu veke vaninogoa; adimai vania nimui vangalaka igamu sui na puku amu totu varangi. Kamu kukuni tania God,

¹² aia e molotsunaligira na tinoni taovia vanga kaekae me molo matagu sosongo vanigira na taovia loki tsapakae ni lao eni.