Linge 75 - Ghari

Nina Aqo God na Pede Tinoni

¹ !Igami ami soadougo igoe nimami God, ami soadougo manana! Ami katevulagia na lokimu igoe, mami gini goko tana rongoqira na omea dou laka igoe o naugira.

² Maia God e goko me tsarivaganana, “Tana tagu inau au titinogoa, i tana nogo sauba inau kau tû ma kau pedegira na tinoni sui tana pede atsa.

³ Me atsa moa ti vaga igira pipi na omea mamauri sui kara gariri, ma na barangengo ke kakasisi popono, minau sauba kau tangolikakaia na pukuna me ke totu kalavata moa.

⁴ Mau tsarivanigira igira na tinoni vanga tsutsukibo laka kara tau goto kaekae;

⁵ mau tsarigotoa vanigira kara mololea na koesegeniqira.”

⁶ Na pedegoto e tau talumai i longa se i tasi, se i vava se i ata,

⁷ maia nogo God nina aqo na pede, maia sauba ke kedegira visana, me ke nusigira visana.

⁸ Na Taovia e tangolia kesa na tseu na uaeni susuliga na korena e totu i laona. Maia e qetua, migira sui lakalaka na tinoni vanga tsutsukibo ara inuvia; ara inuvi korasia me tau lelê goto totuvisu sa kukuduna.

⁹ Minau e utu saikesa kau mololea na gini goko babâ tana rongona nina God a Jakob, se na gini linge na tsonikaeana.

¹⁰ God aia sauba ke kutivanigira na susuligaqira igira na tinoni vanga tsutsukibo, me ke naua me ke dadato babâ gaqira susuliga igira na tinoni e goto niqira sasaga.