Linge 67 - Ghari

Kesa na Linge na Soadouana God

¹ Igoe God ko galuvegami mo ko vangalaka vanigami, mi tana nimu galuve ko irovigami,

² mi tana nogo ti igira sui tana barangengo popono kara donaginia na omea o kilia igoe; migira sui na puku kara donaginia laka o ngaoa manana na maurisiaqira.

³ !Na tinoni sui kara tsonikaego igoe nimami God; igira sui lakalaka na tinoni kara tsonikaego!

⁴ Eo, igira sui na puku kara magemage ma kara lilinge, rongona igoe o tagaovigira na tinoni sui tana gotolaka, mo mataligira pipi na mamatana tinoni tana barangengo popono.

⁵ !Na tinoni sui kara tsonikaego igoe nimami God; igira sui lakalaka na tinoni kara tsonikaego!

⁶ E manana sosongo laka God nida God e vangalaka vanigita; te e gini lakaga dou na mutsa i laona nida uta.

⁷ God e vangalaka manana vanigita; me dou ti igira na tinoni sui tsau bâ tana vovosana na barangengo kara kukuni tania aia.