Linge 64 - Ghari

Nina Nonginongi Kesa Tinoni E Nongia God Ke Reitutugua

¹ !Niqu God ko rongomia niqu nonginongi inau au totu i laona na rota loki! !Au matagunigira gaqu gala, mau nongigo ko maurisiau ma kau tau mate!

² Ko reitutuguau dou ma kau mauri tania niqira togigokosai ara naua igira na tinoni vanga tsutsukibo, me tanigira goto na alaala na tinoni seko.

³ Igira ara asa vavangâ na lapiqira vaga moa ti na isi; mara matania niqira tsaqina goko na keliseko vaga moa ti na pipili.

⁴ Mara taopoi mara vanasigira igira e goto niqira sasaga, ara tau goto matagu, mara tavongani vanasigira lê.

⁵ Ara gini vaimalagaisigi segeniqira niqira vorogokosai na nauseko; mara gini togigokona laka iava tana igira kara molokapusia niqira taviti. Mara tsarivaganana, “?Masei nomoa sauba ke reigita?”

⁶ Ara vorogokona sai laka kara naua na omea seko mara tsaria, “Igita a botsangia na nauana kesa na tsutsukibo loki sosongo.” Eo, na papada e totu popoi i laona na tobana tinoni e kakai sosongo nomoa na padagadoviana.

⁷ Ma God sauba aia ke vanasiginigira nina pipili, me sauba kara tavongani boka tsaku lê.

⁸ Sauba nomoa ke matesiligigira matena niqira tsaqina gokoseko vaga ara tsonia; migira sui kara reigira sauba kara lengulengu lovaqira vanigira.

⁹ Migira sui lakalaka na tinoni sauba kara matagu loki, sauba kara padavisua na omea loki God e naugira, ma kara gini turupatuna bamai.

¹⁰ Migira sui na tinoni e goto niqira sasaga sauba kara gini magemage rago tana rongona na omea loki aia na Taovia e naugira. Me sauba kara ba totu raviravi dou i konina aia; igira sui na tinoni dou sauba kara tsonikaea.