Linge 61 - Ghari

Nina Nonginongi Kesa Tinoni Rongona God Ke Reitutugua

¹ !Niqu God ko rongomia niqu ngangaidato vanigo; mo ko rongomi vatavia niqu nonginongi!

² !Au totu ao tania na veraqu, me ponopala sosongo na tobaqu, mau soago igoe ko sangaau! Ko adiau bâ kesa tana nauna i tana kau totu raviravi dou,

³ rongona igoe nogo niqu reitutugu, o susuliga mo sugutigira gaqu gala.

⁴ Tamivaniau moa ma kau ba totu i laona nimu Vale Tabu tana mauriqu popono; ma kau tsodoa na nauna raviravi dou i vavana na rapomu igoe.

⁵ Igoe God o rongominogoa niqu veke au naua vanigo, mo tusunogoa vaniau na omea vaga ara tamanina igira ara kukuni tanigo igoe.

⁶ !Ko paboa na maurina na taovia tsapakae; me ke mauri babâ ke oka me ke oka!

⁷ Ko naua maia ke tagao saviliu i matamu igoe niqu God; mo ko reitutugua tana nimu galuve vo oli ma nimu doulaka saviliu.

⁸ Vaga ia, minau sauba kau lingena sailagi na tsonikaeamu, kalina au sauvanigo pipi dani na omea inau au vekenogoa vanigo.