Linge 60 - Ghari

Kesa Niqira Nonginongi Igira na Israel Kalina e Tau Managaqira

¹ God igoe o sovetanigami nogo, migoe nogoria o naua te e gini tau managamami; o kore sosongo vanigami nogo, mi kalina eni ami ngasugo ko pilovisumai i konimami.

² Igoe segenimu nogo o naua me kasisi na kao, me gini tangiti; mi kalina eni e dou ti igoe ko mavusia na bokana, rongona e varangi nogo ke toroutsa popono.

³ Igoe segeni nogo o naua vanigami igami nimu tinoni te ami gini rota loki sosongo; mami gini tapulepule bamai vaga moa ti ami inu mami bule.

⁴ Igoe o parovatavigira nogo igira ara kukuni tanigo, rongona ke tau gadovigira niqira bao igira gaqira gala.

⁵ Ko rongomia nimami nonginongi, mi tana susuligamu loki ko laumaurisigami igami nimu tinoni galugaluve.

⁶ Ma God aia e tû tana nina Vale Tabu me tsarivaganana, “Inau au tangomana sui nogo, me sauba kau votâ na kao ni Sekem, ma kau tuvarivotâ na Poi ni Sukot vanigira niqu tinoni.

⁷ I Gilead niqu nogo inau, mi Manase goto; i Epraim gaqu kepi tapala, mi Juda gaqu itoro na taovia tsapakae.

⁸ Mi Moab ke lia niqu popo na vulivuli, mi tana Edom sauba kau tsonidatoa gaqu porotua, na papadana laka inau nogo au tamanina i tana. Me mana nogo gaqu tana vailabugi koluaqira na Pilistia, mau gini gudato tana magemage.”

⁹ ?Niqu God, laka asei nomoa sauba ke adiau bâ i laona na verabau ara poliginia na baravatu kakai? ?Masei sauba ke tudumiau bâ i Edom?

¹⁰ ?Egua laka igoe o sove tanigami manana nomoa igami? ?Me laka tagara ko tau goto dulikolugira nimami alaala na malagai?

¹¹ Ko sangagami na tukapusiaqira gamami gala, rongona nina sasanga na tinoni lê aia e tau lelê lia sa omea.

¹² Me ti vaga igoe God ko totu tabana kolugami igami, me sauba ke managamami; rongona igoe nogo sauba ko tuliusigira igira gamami gala.