Linge 6 - Ghari

Na Nonginongi tana Tagu na Rota

¹ !Taovia ko laka na kore ma na goko kakai vaniaqu! !Ko laka na kedeaqu tana nimu momosatoba!

² !Au maluku sosongo nogo Taovia; ko galuveau! Ko sangaau ma kau susuliga tugua; e labe nogo na koniqu popono,

³ ma na tidaoqu goto e rota loki sosongo. ?Taovia, sauba ke oka koegua sagata ko pipitu ti ko mai sangaau?

⁴ Taovia ko mai tsaku mo ko maurisiau; tana nimu galuve ko laumaurisiau tania na mate.

⁵ Rongona i laona na barangengo na mate e tagara lelê ke kesa ke dona na padavisuamu. Me tagara ke kesa ke dona na tsonikaeamu i tana.

⁶ Au gini kolae sosongo na melu; pipi tana bongi na nigequ e gini kudo popono niqu ngangai; ma gaqu lulunga e gini pori popono na kô na mataqu.

⁷ E kakai sosongo vaniau na momoro; me viri kubi popono na mataqu tana rota na ngangai rongona na omea ara naua vaniau igira gaqu gala.

⁸ !Kamu baligi taniau igamu na tinoni seko! Na Taovia e rongominogoa niqu ngangai.

⁹ E rongomiau kalina au ngangaidato vania rongona aia ke sangaau, maia e tabedoua niqu nonginongi.

¹⁰ Migira gaqu gala, sauba ke ponopala lê na tobaqira rongona e tau managaqira; me sauba kara tavongani vangamâ loki ma kara sugavisu lê.