Linge 58 - Ghari

Na Nongiana God Rongona Ke Kedegira na Tinoni Vanga Tsutsukibo

¹ ?Egua igamu na tinoni tagao, laka igamu amu dona na votagoko laka? ?Me laka igamu amu pedeginigira na tinoni sui tana pedegoto laka?

² !Tagara saikesa! I laona tobamui amu padagira moa na omea seko sauba kamu naugira, mamu sekoli sosongoligira na tinoni i laona na vera.

³ Na tinoni vanga nauseko ara liu sasi tana mauriqira popono; tû tana dani ara botsa ara dona moa na tsoniana na gokopero.

⁴ E dangaligira popono na tabatu na mate vaga moa ti na muata vogata; mara ponotia na kuliqira vaga moa kesa na muata kuli mui,

⁵ maia e utu vania ke rongomia na tatangina nina goko na tinoni aia e dona na tangoliana lê na muata me utu ke gatia, se ke rongomia nina linge kesa tinoni titidaoga aia e sasaga sosongo.

⁶ Niqu God ko tû mo ko bokua na livoqira na laeone veveiga girani.

⁷ Kara nangaligi lê vaga moa na kô kalina e nara bamai me nanga lê tana kao; kara mate lê vaga moa na buruburu ara tsogoria tana sautu.

⁸ Kara nanga lê vaga moa na kena e nanga lê kalina e molo bangona tana kao. Ma kara vaga goto kesa na baka e mate nogo i laona na tobana tinana, maia e tau lelê goto reilakana na aso.

⁹ Kalina igira kara tau nogo padâ, ma God sauba ke tsaku sosongo me ke vutiligigira lê, vaga moa kalina na tinoni e vutiligigira na buruburu seko. Mi tana nina momosatoba loki God, aia sauba ke uviligigira lê kalina igira ara mamauri moa.

¹⁰ Migira na tinoni e goto niqira sasaga sauba kara gini magemage kalina kara reia God e kedegira na tinoni sasi; sauba kara vulia na tuaqira tana gabuqira na tinoni vanga tsutsukibo.

¹¹ Igira na toga sauba kara tsarivaganana, “Igira na tinoni e goto niqira sasaga ara adipeluna manana konina God; eo, e mana saikesa laka God e totu manana, maia e pedegira na tinoni sui tana barangengo.”