Linge 57 - Ghari

Nina Nonginongi Kesa Tinoni Rongona God Ke Sangâ

¹ Ko galuveau kiki niqu God, ko galuveau, rongona inau au mai kau toturavi i konimu. Tana auauna na rapomu igoe inau kau toturavi poi tsau ke puka na legai loki.

² Inau au ngangaidato vania God Susuliga Sosongo, vania God aia e sauvaniau na omea sui au kilia.

³ Aia e totu i baragata sauba ke rongomia niqu nonginongi me ke maurisiau; maia nogo sauba ke tuliusigira igira ara bingi sekoliau. God sauba ke tusuvulagi vaniau nina galuve vo oli ma nina doulaka saviliu.

⁴ Ara totu poliau igira gaqu gala, vaga saikesa moa ti na laeone veveiga. Na livoqira ara vaga moa na bao ma na pipili; ma na lapiqira ara vaga na isi vavanga.

⁵ Niqu God, ko saulabatia tana masaoka laka igoe o loki tsapakae, ma na mararamu ke tsavu poponoa na barangengo.

⁶ Igira gaqu gala ara tsoninogoa niqira vugo gana kara sogotiginiau; minau au totu popono nogo i laona na melu. Igira ara tsaia na qilu tana niqu sautu, migira segeniqira nogo ara puka i laona.

⁷ !Minau au noru saikesaligo moa niqu God; me sauba kau linge ma kau tsonikaego!

⁸ !Mamata igoe na tidaoqu! !Mamata goto kagamu niqu itai tatangi ma niqu tuqulu! Minau sauba kau galisigotoa na aso.

⁹ Sauba kau soadougo igoe Taovia i laoqira na puku tavosi sui. Sauba kau tsonikaego i laoqira na tinoni toga.

¹⁰ Nimu galuve vo oli e dato me suâ na baragata; ma nimu doulaka e peledatoa na masaoka.

¹¹ Niqu God ko saulabatia tana masaoka laka igoe o loki tsapakae, ma na mararamu ke tsavu poponoa na barangengo.