Linge 52 - Ghari

Nina Pede God ma Nina Vangalaka

¹ ?Rongona gua ti igoe na tinoni loki o gini goko kaekae tana rongona na omea seko o naua vanigira nina tinoni God?

² Tana dani popono igoe o totu matengana moa na vorogokona na sekoliaqira na tinoni tavosi; na lapimu e vavanga vaga na risa. Mo tavongani botsangia na gokopero pipi kalina.

³ 0 padalokia bâ na omea seko liusia na omea dou, ma na peropero liusia na manana.

⁴ !Na vanga pero igoe, mo dona sosongo na sekoliginiaqira na tinoni nimu tsaqina goko peropero!

⁵ Vaga ia, ma God sauba ke sekoli pitsugo saviliu; aia sauba ke tangoligo me ke raqaligigo tania na valemu; me ke adiligigo tania na barangengo na mauri.

⁶ Igira na tinoni e gotodou niqira sasaga sauba kara reia e laba vanigo na omea vaga gira, ma kara gini matagu loki; mi muri ma kara tû ma kara kiataginigo ma kara tsarivaganana,

⁷ “Reia bâ na mane iani, aia e tau norua God laka aia ke ravisia, maia e norua moa laka tana nina omea levolevo danga e tugunogoa, me padâ laka i laona nogo nina tsutsukibo ke totu ravidou.”

⁸ Minau au vaga saikesa moa ti kesa na gai na olive aia e vovodato i laona na valena God; au norukakaia na galuvena God aia e vo oli na dani ma na dani.

⁹ Inau sauba kau soadougo sailagi igoe niqu God tana rongona na omea sui igoe o naugira; mi mataqira nimu toga sui sauba inau kau katevulagia laka igoe o dou sosongo.