Linge 48 - Ghari

I Sion Nogo na Verana God

¹ Na Taovia e loki me ulagana kara tsonikae sosongolia bâ i laona nina verabau nida God, tana nina vungavunga tabu.

² I Sion nina vungavunga God e datoga sosongo me dou sosongo bâ na rereina; na verana na taovia tsapakae loki e moloa na magemage loki vania na barangengo popono.

³ Mi laona na vera ia ara totu na valekakai, ma God e sauvulaginogoa laka i tana nogo na tinoni kara ba totu raviravi dou.

⁴ Igira na taovia tsapakae sui lakalaka ara viri saikolu mai laka kara bokia na vungavunga Sion.

⁵ Mi kalina ara mailaba mara reilakana, mara novo mate; mara gini matagu loki mara tsogoligi sui.

⁶ Mi tana ara viri gagariri mara vatsangia na rota loki, vaga saikesa nogo na daki kalina e varangi ke vasua kesa na baka,

⁷ me vaga goto kalina na vaka ara tsodoa na legai loki mara likelike bamai.

⁸ Igita a rongominogoa na omea God e naua, mi kalina eni igita a reilakana nogo i laona na verana nida God, aia na Taovia Susuliga Sosongo; maia nogo sauba ke reitutugu kalavatavia na vera ia na dani ma na dani tagara ke tau sui.

⁹ I laona nimu Vale Tabu igoe God, igami ami padatugua na galuvemu vo oli.

¹⁰ Migira sui na tinoni pipi tana nauna sui ara tsonikaego igoe, ma gamu tangirongo e liuvia na barangengo popono. Igoe o gini tagao na pedegoto.

¹¹ !Kara gini magemage na toga sui ni Sion! Pipi sui nimu pede igoe o naua ara mana sui. !Kara gini magemage igira ara totu i laoqira na verabau ni Juda!

¹² Igamu nina tinoni God, kamu polia na vera ni Sion ma kamu tsokogira sui pipi na kusu ara vaturigira i tana;

¹³ kamu reigira dou na baravatuna na vera ia, ma kamu vilekegira dou na valekakai ara totu i laona, rongona kamu gini turupatuna vanigira na vatavata kara botsamai i muri bâ;

¹⁴ ma kamu tsarivanigira, “Aia nogoria e God nida God e totu saviliu na dani ma na dani; aia nogo sauba ke tudumigita tana tagu sui ke bâ me ke bâ.”