Linge 29 - Ghari

Na Gokona na Taovia e Tangi i Laona na Legai Loki

¹ Tsonikaea na Taovia igamu sui na dalena God, tsonikaea gana loki tsapakae ma na susuligana.

² Tsonikaea na asana tabu na Taovia; tao tsuporu vania na Taovia kalina aia ke labamai.

³ Na gokona na Taovia e kuvia na maorodo; na gokona God Susuliga e poda loki vaga na quluqulu, ma na ileilena na gokona e quluvia na kema popono.

⁴ Na gokona na Taovia e maququ putsikae tana susuligana loki.

⁵ Na gokona na Taovia e kidigira na gai na sida, tsau tana gai na sida ni Lebanon.

⁶ Maia e naua migira na vungavunga ni Lebanon ara tsipukae vaga saikesa moa ti na dalena buluka, ma na Vungavunga Hermon e tsipuleka vaga moa ti na buluka mane vaolu.

⁷ Na gokona na Taovia e naua me kirapi na angaanga.

⁸ Ma na gokona e naua me gini kakanu popono na legai mangu; na Taovia e kanulia na legai mangu ni Kades.

⁹ Na gokona na Taovia e birugira na gai loki, me rusia na rauqira mara viri dudu sui. Migira sui ara totusai i laona na Vale Tabu ara gudato mara tsaria, “!Tsonikaea God!”

¹⁰ Na Taovia e tagaovi kaputia na maorodo; maia e taovia tsapakae na dani ma na dani.

¹¹ Na Taovia e saua na susuligana vanigira nina tinoni, me saugotoa nina rago vanigira.