Linge 26 - Ghari

Nina Nonginongi Kesa na Tinoni Dou

¹ Taovia ko saulabatia laka inau au tau sasi, rongona au naua moa na omea e goto i matamu, mau noru kalavatavigo igoe.

² Ko vilekea na laoqu mo ko tovoleau Taovia; ko pedea na laona na sasagaqu ma na papadaqu.

³ Nimu galuve vo oli e mataliau, me tudumiau sailagi tana sautuna na manana.

⁴ Au tau dona na dulikoluaqira na tinoni e tabaru niqira sasaga. Mau tau goto dona kau naua sa omea kolugira na tinoni vanga malapalu.

⁵ Au reisavi sosongolia na dulikoluaqira na tinoni seko, mau sove tanigira na tinoni vanga tsutsukibo.

⁶ Taovia, inau au vulia na limaqu kau gini sauvulagia laka inau au tinoni dou mau tau sasi, mau sanga na samasama poliana nimu belatabu.

⁷ Au lingena na linge tabu na soadouamu mau katevulagia pipi sui nimu aqo loki igoe o naugira.

⁸ Au reingao sosongolia na vale i tana o totu igoe Taovia, na nauna i tana e totu na mararamu.

⁹ Ko laka na matesiaqu saisai koluaqira na tinoni sasi; ko gaeau moa tania na kede e totupitugira na tinoni vanga vailabumate,

¹⁰ igira ara tau kuti na nauana na omea e seko, mara lavu pipi kalina moa na adiqolona na tangopeke.

¹¹ !Minau moa au naua pipi kalina na omea e goto; me vaga ia, me dou ti igoe Taovia ko galuveau mo ko maurisiau!

¹² Na tuaqu ara tukakai nogo tana sautu atsa; mi laona niqira saikolu igira nimu tinoni inau au tsonikaego igoe Taovia.