Linge 24 - Ghari

God Aia na Taovia Tsapakae Loki

¹ Na barangengo migira sui pipi na vangana i laona nina omea nogo na Taovia; migira sui goto ara mauri i laona ara nina nogo aia.

² Aia e logoa na barangengo tana mao rodo, me vaturia na tsutsuvatuna tana levugana na kema.

³ ?Laka asei nomoa e ulagana ke dato bâ tana nina vungavunga na Taovia? ?Masei e tugua ke sage bâ tana nina Vale Tabu?

⁴ Igira moa e male dou niqira sasaga ma niqira papada, mara tau samasama vanigira na god peropero, mara tau goto dona kara naua na veke peropero lê.

⁵ Igira nogo na Taovia sauba ke vangalaka vanigira me ke maurisigira; God sauba ke adilabatia laka ara tinoni dou mara tau sasi.

⁶ Igira nogoria na vatana na tinoni vaga gira, ara dona na lalaveana God, ma na mailaba i matana nina God a Jakob.

⁷ Sangavigira na matsapakapu, sangavigira na banina na matsapa saliu, me ke sagemai na taovia tsapakae loki.

⁸ ?Masei aia na taovia tsapakae loki vaga ia? Aia nogo na Taovia e susuliga me putsikae sosongo, aia nogo na Taovia e tangomana tana vailabu.

⁹ Sangavigira na matsapakapu, sangavigira na banina na matsapa saliu, me ke sagemai na taovia tsapakae loki.

¹⁰ ?Masei aia na taovia tsapakae loki vaga ia? !Na Taovia aia e tangomana tana vailabu aia nogoria na taovia tsapakae loki!