Linge 20 - Ghari

Na Nonginongi Tana Rongona Na Tangomana Tana Vailabu

¹ !Na Taovia ke rongomia nimu nonginongi kalina igoe ko totu i laona na rota! !Ma nina God a Jakob aia nogo ke reitutugugo!

² Aia nogo ke sangago tû tana nina Vale Tabu, me ke saua bâ vanigo nina sasanga tû i Sion.

³ Maia nogo ke tabedougira pipi sui nimu sausau, me ke reingaogira pipi nimu kodoputsa.

⁴ Ke saua vanigo na omea sui o kilia, me ke naua me ke gini managamu pipi sui tana omea igoe o ngaoa na nauana.

⁵ Mi tana ti igita sui ka gudato tana magemage matena e managamu igoe, ma ka lokisiginia nimu tangomana tana tsonikaeana nida God. God aia nogo ke tusuvanigo na omea sui igoe o nongia i konina.

⁶ Mi kalina eni au donaginia laka na Taovia nogo e tusua na tangomana vania nina taovia tsapakae aia segeni e vilinogoa; me rongomia nina nonginongi tû i gotu tana nina baragata tabu, mi tana susuligana nogo ia, ti aia e tusuvania na tangomana loki sosongo.

⁷ Visana ara vataraginia gaqira susuliga tana niqira terê na vailabu, mara visana tavosi tana niqira ose, migita a norua moa na susuligana na Taovia nida God.

⁸ Na vatana na tinoni vaga igira, sauba kara tubulagi ma kara puka lê, migita sauba ka tukae ma ka tsotsovata kakai.

⁹ Taovia ami nongigo ko tusuvania na taovia tsapakae na tangomana, mo ko rongomigami kalina kami soago ko sangagami.