Linge 142 - Ghari

Nina Nonginongi Kesa Tinoni Rongona God Ke Sangâ

¹ Au ngangaidato vania na Taovia rongona aia ke sangaau; mau amiami tsai vania.

² Au tsarivulagi vania pipi sui na omea ara ngoliau; migira goto na rota sui ara gadoviau.

³ Mi kalina e varavara nogo kau pukavisu lê, maia e dona sui nogo niqu omeomea. Tana sautu tana sauba kau liu inau, igira gaqu gala ara molopoia vaniau gaqu taviti.

⁴ Mi kalina au moro bamai i ligisaqu, mau tau nogo reia ke kesa ke sangaau, tagara goto ke kesa ke reitutuguau, se ke boeginiau.

⁵ Taovia au ngangaidato vanigo ko sangaau; Taovia igoe nogo niqu reitutugu; igoe segeni moa au ngaoa kau tamanina tana mauri ni lao eni.

⁶ Rongomivatavia niqu ngangaidato vanigo ko sangaau, rongona inau au seko pitsu nogo. Laumaurisiau tanigira gaqu gala; igira ara susuliga liusiau nogo inau.

⁷ Ko adiligi taniau na rota loki ara bingi sekoliginiau; mi tana ti inau kau tsonikaego i laona niqira saikolu nimu tinoni, tana rongona igoe o dou sosongo vaniau.