Linge 141 - Ghari

Na Nonginongi na Ngulavi

¹ !Taovia, au soago, ko tsaku mo ko sangaau kalina ia! Ko rongomi vataviau kalina kau soago.

² Ko adidoua niqu nonginongi vaga moa na pungu na bulunagai uruuru, ma na limaqu au abedatoa vanigo vaga moa na savori-kodoputsa tana ngulavi.

³ Taovia, ko reitutugudoua na mangaqu, mo ko mataligira dou niqu goko.

⁴ Ko didia taniau na nauana na omea seko ma na sangasage i laona niqira sasaga tabaru igira na tinoni seko. Mo ko laka goto na tamivaniaqu kau sangapata tana niqira kavomutsa.

⁵ E dou moa ti vaga kesa na tinoni dou ke kedeau me ke totosasaga vaniau tana galuve, minau moa e utu saikesa kau tamivanigira na tinoni vanga nauseko kara tsonikaeau, rongona inau au nonginongi sailagi vania God ke kedegira tana rongona niqira sasaga tabaru.

⁶ Mi kalina kara tangoligira igira niqira tagao ma kara tsonitsunaligira tana maragova, mi tana ti igira na toga kara donaginia laka nina goko na Taovia ara mana sui.

⁷ Ma na suliqira kara viri totu piriutsa bamai tana mangana na qilu, vaga moa na takutina gai ara tala mesimesigira.

⁸ Minau au norugo babâ moa igoe niqu Taovia ma niqu God mau mai kau totu ravidou i konimu. !Migoe ko laka saikesa na tamivaniaqira kara matesiau!

⁹ Ko tukapusia na taviti ara molomanogati vaniau nogo, ma niqira pidipidi ara moloa igira na vanga nauseko.

¹⁰ Migira na vanga tsutsukibo kara sogo segeni i laona niqira taviti, minau moa kau liusavi tania.