Linge 140 - Ghari

Kesa Tinoni e Nongia God Ke Reitutugua

¹ Taovia, ko maurisiau tanigira na tinoni seko; ko laumaurisiau tanigira na tinoni vanga tangopeke seko.

² Igira ara vorogokona sailagi moa na nauana na omea seko, mara tsaikore sailagi.

³ Na lapiqira e vaga moa na muata e dona na gatimatesi tinoni; ma niqira tsaqina goko ara gini sekoli tinoni, vaga moa na muata vogata e totu na tabatu i konina.

⁴ Taovia, ko maurisiau tania na limaqira na tinoni vanga tsutsukibo; ko laumaurisiau tanigira na tinoni vanga tangopeke seko, igira ara vorogokona na tsogori pukaliaqu.

⁵ Igira na tinoni kaekae ara vangaraunogoa vaniau gaqu taviti; ara molo kapusia niqira pidipidi tana kau liu bâ, mara matalogoa niqira taviti gana kau sogo i laona.

⁶ Minau au tsarivania na Taovia, “Igoe nogo niqu God.” !Taovia, ko rongomia niqu ngangaidato vanigo rongona igoe ko sangaau!

⁷ Taovia niqu God, igoe nogo o susuliga na sogogaqu, mi tana tagu na vailabu igoe nogo o dilaau.

⁸ Taovia, ko laka na tamivaniaqira na vanga tsutsukibo na adiana na omea ara kilia; mo ko laka goto na tamivaniaqira ke managaqira tana omea ara vorogokona.

⁹ Ko laka na tami ke managaqira igira gaqu gala; mo ko naua ma na omea seko igira ara ngaoa na nauvaniaqu inau, ke kidivisu me ke gado i koniqira segeni.

¹⁰ Ko naua ma na vatu romaroma ke puka bâ i koniqira; ma kara tsonitsunagira i laona na qilu loki ma kara tau lelê goto rutsu tania.

¹¹ Ko laka goto na tamiana ke managaqira igira ara dona na keliseko; mo ko naua me ke kesa na omea seko ke gadovigira na vanga tsaikore ma kara mate.

¹² Taovia, inau au donanogoa laka igoe o isutuguqira igira ara tau tamanina sa omea, mo aqosia na pedegoto vanigira igira ara kilia na sasanga.

¹³ Igira e gotodou niqira sasaga sauba kara tsonikaego; me sauba kara totu sailagi i matamu igoe.