Linge 136 - Ghari

Kesa na Linge na Soadouana God

¹ Soadoua na Taovia, rongona e dou aia, ma nina galuve e totu saviliu.

² Soadoua aia e loki tsapakae bâ liusigira pipi sui na god; rongona nina galuve e totu saviliu.

³ Soadoua aia e susuliga putsikae bâ liusigira pipi sui na taovia; rongona nina galuve e totu saviliu.

⁴ Aia segeni moa e dona ke aqosi valatsatsa loki; rongona nina galuve e totu saviliu.

⁵ Mi tana nina sasaga loki nogo aia e aqosiginia na baragata; rongona nina galuve e totu saviliu.

⁶ E ovukaea na barangengo tana maorodo; rongona nina galuve e totu saviliu.

⁷ Aia e volakaira na aso ma na vula; rongona nina galuve e totu saviliu.

⁸ Na aso ke tagaovi kaputia na dani; rongona nina galuve e totu saviliu.

⁹ Ma na vula migira na veitugu kara tagaovi kaputia na bongi; rongona nina galuve e totu saviliu.

¹⁰ Aia e labumatesigira na daleqira mane botsaida igira na Ejipt; rongona nina galuve e totu saviliu.

¹¹ Aia e adirutsumigira na toga ni Israel tania i Ejipt; rongona nina galuve e totu saviliu;

¹² tana susuligana nogo na limana aia e nauginia, rongona nina galuve e totu saviliu.

¹³ Aia e sarovotâ na Tasi Tsitsi; rongona nina galuve e totu saviliu;

¹⁴ maia e ida vanigira nina toga mara liu tsapatugu bâ i konina; rongona nina galuve e totu saviliu.

¹⁵ Maia e lumia na taovia tsapakae ni Ejipt kolugira nina alaala na mane vaumate; rongona nina galuve e totu saviliu.

¹⁶ Aia e ida vanigira nina toga mara liu tana kaomate; rongona nina galuve e totu saviliu.

¹⁷ Aia e labumatesigira na taovia tsapakae susuliga; rongona nina galuve e totu saviliu.

¹⁸ Maia e labumatesigira goto na taovia tsapakae tangirongo; rongona nina galuve e totu saviliu.

¹⁹ Aia nogo a Sihon, niqira taovia tsapakae igira na Amor; rongona nina galuve e totu saviliu;

²⁰ maia a goto a Og na taovia tsapakae ni Basan; rongona nina galuve e totu saviliu.

²¹ Me adia niqira kao igira me sauvanigira nina tinoni; rongona nina galuve e totu saviliu;

²² me tusulea niqira kao vania Israel nina tinoni aqo ia; rongona nina galuve e totu saviliu.

²³ Aia e tau padalegita kalina igira ara tuliusigita; rongona nina galuve e totu saviliu.

²⁴ Maia e laumaurisigita tania na limaqira gada gala; rongona nina galuve e totu saviliu.

²⁵ Aia e palagira pipi na omea mamauri sui; rongona nina galuve e totu saviliu.

²⁶ Soadoua God aia e totu i baragata; rongona nina galuve e totu saviliu.