Linge 116 - Ghari

Kesa Mane e Putsi Tania na Mate Me Soadoua God

¹ Au galuvea na Taovia rongona aia e rongomiau; me rongomi vatavigira niqu nonginongi.

² Aia e rongomiau pipi kalina au ngangaidato vania.

³ Na sosorina na mate ara totu polipoliau; ma na papadana na qiluqilu e koviau popono; me ngoli sosongoliau na matagu ma na padasavi.

⁴ Te au tû, mau ngangaidato vania na Taovia mau tsaria, “!Taovia au ngasugo ko maurisiau!”

⁵ Na Taovia e doulaka me mana saviliu. Eo, nida God igita e dona sosongo na galuve tinoni.

⁶ Na Taovia e reitutugugira igira e tagara kesa ke sangagira; mi kalina igira ara tovoa laka kara sekoliau inau, maia e laumaurisiau.

⁷ Ko mango rago igoe na tidaoqu, rongona aia na Taovia e dou sosongo vaniau.

⁸ Na Taovia e maurisiau tania na mate; maia nogo e saluvaligia na kô na mataqu, me utusigira gaqu gala na tuliusiaqu.

⁹ Me vaga ia, minau au dona na liu i matana na Taovia tana verana na mauri.

¹⁰ Au tutunina babâ moa na Taovia, atsa moa ti au tsaria, “Inau au seko pitsu nogo.”

¹¹ Me atsa moa goto kalina au matagu sosongo mau tsaria, “E tagara nomoa kiki ke kesa kau noru kalavatavia inau.”

¹² ?Ma na omea gua tugua kau sauvania na Taovia rongona aia e dou sosongo vaniau?

¹³ Sauba kau savori vania na sausau na uaeni na mani soadouana rongona aia e maurisiau.

¹⁴ Mi laona nogo niqira saikolu igira nina tinoni sauba inau kau sauvania na omea au vekenogoa vania.

¹⁵ !E gini padasavi sosongo na Taovia kalina e mate kesa nina tinoni!

¹⁶ Taovia inau nimu tinoni aqo; mau aqo vanigo vaga nogo na tinaqu e naua. Migoe nogo o maurisiau tania na mate.

¹⁷ Me sauba kau savori vanigo na kodoputsa na mani soadouamu ma kau saudatoa niqu nonginongi vanigo.

^18-19 I mataqira nimu tinoni sui, tana savuna matsapana nimu Vale Tabu i Jerusalem, sauba kau manalia na omea au vekenogoa vanigo. !Tsonikaea na Taovia!