Linge 108 - Ghari

Kesa Tinoni e Nongia God Ke Sangâ Na Tukapusiaqira Gana Gala

¹ !Inau au noru saikesaligo moa niqu God! !Me sauba kau linge ma kau tsonikaego! !Mamata igoe na tidaoqu!

² !Mamata goto kagamu niqu itai tatangi ma niqu tuqulu! Me sauba inau kau galisigotoa na aso.

³ Sauba kau soadougo igoe Taovia i laoqira na puku sui. Ma kau tsonikaego i laoqira na tinoni sui.

⁴ Nimu galuve vo oli e dato me suâ na baragata; ma nimu gotolaka e peledatoa na masaoka.

⁵ Niqu God ko saulabatia tana masaoka laka igoe o loki tsapakae, ma na mararamu e tsavu poponoa na barangengo.

⁶ Ko rongomia niqu nonginongi, mi tana susuligamu loki ko laumaurisigira nimu tinoni igira igoe o galuve sosongoligira.

⁷ Ma God aia e tû tana nina Vale Tabu me tsarivaganana, “Inau au tangomana nogo, me sauba kau votâ na kao ni Sekem, ma kau tuvarivotâ na poi ni Sukot vanigira niqu tinoni.

⁸ I Gilead niqu nogo inau, mi Manase goto; I Epraim gaqu kepi tapala, mi Juda gaqu itoro na taovia tsapakae.

⁹ Mi Moab ke lia niqu popo na vulivuli, mi tana Edom sauba kau tsonidatoa gaqu porotua, na papadana laka inau nogo au tamanina i tana. Me sauba kau gudato tana magemage rongona e managaqu tana vailabugi kolugira na Pilistia.”

¹⁰ ?Niqu God, laka asei nomoa sauba ke adiau bâ i laona na verabau ia ara poliginia na baravatu kakai? ?Masei sauba ke tudumiau bâ i Edom?

¹¹ ?Egua laka igoe o sove tanigami manana nomoa igami? ?Me laka e utu goto ko dulikolugira nimami alaala na mane vaumate na vano tana vailabu?

¹² Ko sangagami na tukapusiaqira gamami gala, rongona nina sasanga na tinoni lê e tau lelê lia sa omea.

¹³ Me ti vaga God ke totu tabana kolugita igita, me sauba ke managada, rongona aia nogo sauba ke tuliusigira igira gada gala.