Linge 101 - Ghari

Nina Veke Kesa na Taovia Tsapakae

¹ Taovia sauba kau teâ kesa na linge tana rongona nimu galuve ma nimu pedegoto, ma kau lingena vanigo.

² Me sauba kau tovoa ke gotodou pipi kalina niqu sasaga. ?Migoe Taovia ke ngisa ti ko mai mo ko sangaau? Inau sauba kau tovoa ke male dou niqu sasaga i laona na valequ,

³ me utu goto kau tamivania sa omea seko ke totu i laona. Au reisavi sosongolia niqira omeomea igira ara piloligi tania God; mau tau goto ngaoa kara sage i valequ.

⁴ Me sauba kau sove tania pipi na papada e tau goto, mau tau goto ngaoa kau sanga i laona kesa na omea e seko.

⁵ Sauba kau suilavaginia nina guguri aia e vaitsari gaqira popoi na tinoni tavosi; me utu goto kau berengiti kolua na tinoni vanga kaekae me dona moa na padaloki segenina.

⁶ Sauba kau tabedougira igira ara totukakai konina God, ma kau tamivanigira kara totu koluau i laona na valequ. Migira e gotodou niqira sasaga, sauba kau tamivanigira kara aqo vaniau.

⁷ Sauba ke tagara goto sa tinoni e dona na pero ke totu i laona na valequ; me utu kau tamivania sa tinoni vanga malapalu ke mai totu i mataqu inau.

⁸ Me pipi dani moa sauba kau tau kuti na matesiaqira igira na vanga tsutsukibo ara totu i laona na verada; ma kau tsialigigira pipi sui na tinoni vanga nauseko tania nina verabau na Taovia.