Linge 1 - Ghari

PAPI KESA ( Linge 1–41 ) Na Magemage Manana

¹ Ke mage aia na tinoni e sove tania na muriana niqira totokoe igira na tinoni seko, me tau muria niqira sasaga igira na tinoni sasi, se e tau goto dona ke sangatotu i laona niqira sai igira ara peâ na mangana God.

² Na tinoni dou vaga ia, e tsodoginia nina magemage tana muriana nina Ketsa na Taovia, me tau kuti na padaana i tobana na dani ma na bongi.

³ Aia e vaga moa ti kesa na gai e vovodato i ligisana na ko tsatsali, me gini molo vuana dou tana tagu laka, me tau goto dona ke matsele lê na rauna. Maia na tinoni vaga ia e tangomana sailagi pipi tana aqo sui e naua.

⁴ Migira na tinoni seko ara tau goto dona kara nauvaganana ia; igira ara vaga ti na rau matemate lê, e mai na guguri me lovosaginigira lê.

⁵ Igira na tinoni sasi sauba God ke kedegira, me ke molovotagira tanigira nina tinoni segeni nogo God.

⁶ Na Taovia aia e mataligira me reitutugugira igira e gotolaka niqira sasaga, migira na tinoni seko ara muria moa na sautu e kalea na mate saliu.