Jona 2 - Ghari

Nina Nonginongi a Jona

¹ Me tû i laona na tobana na tsetse loki ia, ma Jona e nonginongi vania na Taovia nina God me goko vaganana iani:

² “Taovia, i laona niqu rota inau au soago, migoe o rongomiau. I laona na qouna na maorodo au ngangaidato vanigo ko sangaau, migoe o sangaau.

³ Igoe nogo o tsonitsunaau tana pikana na maorodo, i lao vasau, i tana na tasi e kokoponotiau, migira sui nimu panu loki ma na ovu ara liu kaoniau.

⁴ Au pada laka igoe o tsoniligi saikesaliau nogo tania na matamu igoe, me ke utugana vaniau goto kau reilakana tugua nimu Vale Tabu.

⁵ Ma na tasi e tsavuau, me gini utugana vaniau na magomago, ma na maorodo e poli poponoau. Ma na buruburu ni tasi e virigi polia na lovaqu.

⁶ Au tsuna bâ tsau tana pukuna na vungavunga, i tana e totu na barakapu e vongo saviliu. Migoe nogo Taovia niqu God o maurisiau tania na qou loki ia.

⁷ Mi kalina au vatsangia na mauriqu e nananga lê nogo taniau, mi tana au nongigo Taovia, mi laona nimu Vale Tabu igoe o rongomiau.

⁸ Igira ara samasama vanigira na god peropero ara piloligi tanigo igoe na God mana.

⁹ Minau sauba kau lingena na tsonikaeamu igoe, ma kau savori-kodoputsa vanigo, ma kau manalia na omea au vekenogoa vanigo. !Rongona na mauri sui e talumai i konimu moa igoe Taovia!”

¹⁰ Ma na Taovia e ketsalia na tsetse ke mumutali longâ a Jona i one, me laba vaga.