Binaboli 15 - Ghari

Nina Linge a Moses

¹ Mi tana ma Moses migira sui na toga ni Israel ara teâ kesa na linge vania na Taovia mara tsaria: “Inau sauba kau linge vania na Taovia, rongona aia e mana sosongo gana; me tsoni luvusigira i laona na tasi igira sui na ose migira ara sage i koniqira.

² Na Taovia aia nogo e isutuguqu; aia segenina nogo e laumaurisiau. Aia nogo niqu God, minau sauba kau tsonikaea, aia nina God na tamaqu, ma kau linge tana rongona gana loki tsapakae.

³ Na Taovia aia e malagai sosongo; ma na Taovia nogo na asana.

⁴ “Aia e tsonitsunagira i laona na tasi na alaala popono na malagai ni Ejipt kolua niqira terê; ma gaqira taovia susuliga bâ ara viri lulumi sui i laona na Tasi Tsitsi.

⁵ Ma na tatarina na obo e poropoigira sui; mara viri pukaluvu i laona na maorodo vaga moa na vatukulu.

⁶ “Taovia, na limamu madoa e susuliga tsapakae; maia nogo o tairutuginigira gamu gala.

⁷ Tana susuligamu loki tsapakae igoe o tsoni pukaliginigira gamu gala; ma na koremu e botsadato me iruvigira vaga moa na buruburu makede.

⁸ Igoe o uvia moa na tasi, ma na tasi e tsupudato ruka tabana; me tudato vaga moa ti na ponoponona na vale; mi tana e mao liuliu bâ na tasi, i tana nogo e mamatsa me kakai vaga na vatu.

⁹ Ma na gala e tsaria, ‘Inau sauba kau takuvigira ma kau tangoligira; ma kau langâ niqu isi ma kau labumatesiginigira; me sauba kau tuvarigira niqira omea tatamani, ma kau aditamaniqu igira na omea sui au ngaoa.’

¹⁰ Migoe Taovia o uvigira moa, migira na malagai ni Ejipt ara viri lulumi sui; mara pukaluvu vaga moa na vatukulu tana tasi loki.

¹¹ “!Taovia, asei i laoqira na god ke atsakolugo igoe? ?Asei ke vaga igoe, o susuliga tsapakae mo tabu loki? ?Asei tangomana ke aqosigira na valatsatsa ma na omea ganataga loki sosongo vaga o naua igoe?

¹² Igoe o tatakatsinia na limamu madoa, ma na barangengo e konomi poponogira gamami gala.

¹³ Igoe o manalia nimu veke, mo idagana sautu vanigira na tinoni igoe o laumaurisigira; mi tana susuligamu loki o tudumigira bâ tana nimu kao tabu.

¹⁴ Migira sui na puku na tinoni tavosi ara rorongo, mara gini gagariri tana matagu; migira sui goto na Pilistia e gadovigira na matagu loki.

¹⁵ Igira na ida tana Edom ara viri matagu mate; migira na mane malagai susuliga bâ tana Moab ara gagariri; me puka lê gaqira malagai igira na tinoni sui tana Kanaan.

¹⁶ Ma na matagu loki sosongo e tsavu poponogira. Ara reilakana na susuligamu igoe Taovia, mara totu babangataga tana matagu poi tsau igira nimu toga ara liu putsi, igira nogo na tinoni igoe o maurisigira tania na totu tseka.

¹⁷ Migoe o livugira tana nimu vungavunga tabu, i tana igoe Taovia o vilinogoa ke lia na valemu, tana Vale Tabu igoe segenimu nogo o logoa.

¹⁸ Migoe nogo Taovia, sauba ko taovia tsapakae na dani ma na dani.”

Nina Linge ko Miriam

¹⁹ Migira na toga ni Israel ara liusavu tana kao mamatsa i levugana na tasi. Mi kalina niqira terê ma niqira ose migira na mane ni Ejipt ara sage i koniqira ara tsuna i laona na tasi, maia na Taovia e adivisutugua na tasi, me koko ponotigira.

²⁰ Maia ko Miriam na propete, na tasina daki a Aaron, e adia nina tsetsê, migira sui na daki ara tsarimurina ara rerekesigotoa niqira tsetsê mara gagavai.

²¹ Ma ko Miriam e lilinge vanigira me tsaria: “Linge vania na Taovia, rongona aia e mana sosongo gana; aia e tsoni luvusigira i laona na tasi igira sui na ose migira ara sage i koniqira.”

Na Ko Vavai

²² Mi muri, ma Moses e adigira na tinoni ni Israel tania na Tasi Tsitsi mara liu vano tana kaomate ni Sur. Mi laona e tolu na dani popono ara savu tana kaomate ia, mara tau goto tsodoa sa kô.

²³ Mi muri, mara mailaba kesa tana nauna ara soaginia i Mara, ma na kô i tana e vavai sosongo me tau tangomana na inuviana. Aia nogo na rongona te ara soaginia tana nauna ia Mara.

²⁴ Migira na tinoni ara goko korekore vania a Moses mara veisuâ, “?Ma nagua sauba ka inuvia?”

²⁵ Ma Moses e nonginongi kakai vania na Taovia, ma na Taovia e tusuvania kesa na takutina na gai, maia e adia me tsonitsunâ i laona na kô, ma na kô ia e mami, me dou vania na inuviana. Mi tana nauna nogo ia na Taovia e tusuvanigira visana na vali gana kara maurimuria, mi tana goto na Taovia e tovolegira.

²⁶ Maia e tsaria, “Ti vaga igamu kamu rongomangaqu saikesa inau ma kamu naua na omea inau au pada e goto, ma kamu muridougira sui niqu ketsa, me sauba e utu kau kedeginigamu goto sa vatana lobogu vaga au rotasiginigira nogo na Ejipt. Rongona inau nogo na Taovia au tali maurisigamu.”

²⁷ Mi muri mara balaba i Elim, i tana ara totu sangavulu ruka na vuravura, mara vitu sangavulu na gai na koirou, mi tana ara vaturikaegira niqira valepolo i ligisana na kô.