2 Samuel 22 - Ghari

Nina Linge na Tangomana a David

¹ Mi kalina na Taovia e laumaurisia a David tania na limana a Saul migira goto gana gala tavosi, maia David e teâ na linge iani vania na Taovia:

² Na Taovia aia nogo niqu reitutugu, aia nogo niqu baravatu kakai.

³ Niqu God aia nogo e reitutuguau, mi konina nogo ia inau au totu raviravi dou. Aia e dilaau vaga moa na tako; maia nogo e isutuguqu me ravisiau. Aia nogoria niqu vagamauri; e reitutuguau me maurisiau tanigira na tinoni vanga tangopeke seko.

⁴ Inau au soâ na Taovia, maia e laumaurisiau tania na limaqira gaqu gala. !Tsonikaea na Taovia!

⁵ Na panuna na mate ara polipoliau; ma na panuna na lualua ara karara tsavuau.

⁶ Na sosorina na mate ara virigi poliau, ma na qilu e mangamanga nogo me totu pituau.

⁷ Mi laona niqu rota inau au soâ na Taovia; au ngangaidato vania niqu God rongona aia ke sangaau. Mi laona nina valetabu aia e rongomia na tatangina na lioqu; maia e rongomi vatavia niqu ngangaidato vania.

⁸ !Mi tana, ma na barangengo e kakanu me olaola takuti; ma na pukuqira na masaoka ara viri kakasisi rongona God e kore loki sosongo!

⁹ Na pungu bau e ngusu rutsumai tana babana na isuna, ma na iruna na lake loki ma na madaova gagâ ara rutsu tana mangana.

¹⁰ E ratsivotâ na masaoka me tsunamai, kolu parako bau i vavana na tuana.

¹¹ Aia e gini lovo tsaku tana rapona na angelo; me gini vanovano na rapona na guguri.

¹² Maia e gini popolo popono moa na rodo; ma na parako matolu na usa e totu polipolia,

¹³ mi tana mararana na makana ara botsamai na kirapina na angaanga.

¹⁴ Mi tana, ma na gokona na Taovia aia e totu tana parako, e poda loki vaga na vivisa, mara rongomia na tatangina na liona aia e God Susuliga Sosongo.

¹⁵ Maia e gini vanavana nina pipili me sarangasigira gana gala; me naua me kirapi na angaanga me gini tsia tsogoligira.

¹⁶ Na pakokana na mao rodo e mamatsa kuti lê, ma na papakana na barangengo e totu labalaba lê kalina aia na Taovia e taimataqira gana gala, me goraragira tana nina kore loki.

¹⁷ Tû i gotu na Taovia e tatango tsunamai i lao me tangoliau, me raqakaeau tania na mao rodo.

¹⁸ Aia e laumaurisiau tania na limaqira susuliga igira gaqu gala, me tanigira sui goto igira ara reisaviau igira nogoria ara susuliga liusiau inau.

¹⁹ Mi kalina inau au totu moa i laona na rota loki migira ara maiginiau, maia segeni nogo na Taovia e reitutuguau.

²⁰ Aia e sangaau mau gini tanusi tania na rota; maia nogo e laumaurisiau rongona e reingao sosongoliau.

²¹ Na Taovia e sauvaniau na peluna rongona au naua na omea e goto i matana; maia e soadouau rongona e male dou niqu sasaga.

²² Inau au muridoua nina ketsa na Taovia; mau tau goto piloligi tania niqu God.

²³ Inau au muritaonigira pipi sui nina vali; mau tau goto petsakoe mangana.

²⁴ Maia e donagininogoa laka au tau tsukia sa sasi, me laka inau au parovatavi segeniqu kau tau naua sa omea seko.

²⁵ Maia nogo na rongona ti aia e gini tusua vaniau na peluna rongona inau au naua na omea e goto i matana, maia e donaginiau laka e male dou niqu sasaga inau.

²⁶ Taovia, igoe o mana vanigira igira ara mana vanigo, mo dou saviliu vanigira igira e doulaka niqira sasaga.

²⁷ Igoe o sauvulagia nimu sasaga male vanigira igira ara sasaga male i matamu, mo reisavigira igira e tabaru niqira sasaga.

²⁸ Igoe o maurisigira igira ara totu palatsuna, mo molotsunaligira igira ara sasaga kaekae.

²⁹ Eo Taovia, igoe nogo niqu marara; igoe nogo o mararasiligia na rodo e totu i tobaqu.

³⁰ Igoe o malagaisiau agana kau gini susuliga na baginiaqira gaqu gala, mo susuligasiau agana kau tsipu kaoniginia niqira bara.

³¹ !Na God iani e gotolaka pipi nina aqo aia e naua, ma nina tsaqina goko sui ara mana saikesa! Aia e vaga saikesa nogo ti na tako vanigira igira sui ara ba totu raviravi i konina.

³² Na Taovia aia segenina moa e God; God segeni moa aia nida isutugu.

³³ Aia nogo na God e sangaau ti au gini susuliga; maia nogo e mataliau te au gini liu dou tana sautu.

³⁴ Me naua na tuaqu kara tsotso kakai dou vaga moa na tuana na dia; me adiravisiau bâ tana kelana na vungavunga.

³⁵ Aia e sasaniginiau na omea sui gana na vailabu, rongona kau gini tangomana na gini vanavana na parige susuliga bâ.

³⁶ Taovia igoe nogo o reitutuguau mo maurisiau; migoe o sangaau me gini tangiloki gaqu rongo.

³⁷ Igoe nogo o mangâ na sautu vaniau tana kau liu bâ, me gini tau tsotso terere na tuaqu.

³⁸ Inau au takuvigira gaqu gala mau tangoligira; mau tau goto mango poi tsau kalina au labupukaligira sui.

³⁹ Au labupukaligira me utu goto vanigira kara tû; ara viri pukatsuna sui i tuaqu.

⁴⁰ Igoe nogo o sauvaniau na susuliga gana na vailabu te au gini tangomana na tuliusiaqira gaqu gala.

⁴¹ Igoe nogo o naua mara tsogo lê taniau igira gaqu gala; mau labumatesigira igira sui ara reisaviau.

⁴² Igira ara lavea kesa ke sangagira, me tagara lelê ke kesa ke maurisigira; mara ngangaidato vania na Taovia, maia e tau goto rongomia niqira nonginongi.

⁴³ Inau au tsogori rapasigira, migira ara rapa vaga saikesa ti na papasa lê; mau tsogorigira lê vaga moa ti na boko tana sautu.

⁴⁴ Igoe o maurisiau tania na limaqira niqu tinoni vanga livusuguradi, mo kakaisitugua niqu tagao kaputigira na puku tavosi danga; migira na tinoni inau au tau vati donaginigira moa, igira goto ara totu sui moa i vavana niqu tagao inau.

⁴⁵ Igira na tinoni ni veratavosi ara tsuporu i mataqu; mi kalina ara rongomia niqu goko migira ara rongomangaqu.

⁴⁶ E viri puka lê sui gaqira susuliga, mara gariri lê kalina ara rutsu tania niqira baravatu kakai.

⁴⁷ !Na Taovia aia e totu mamauri manana! !Tsonikaea aia niqu reitutugu! !Katevulagia gana loki tsapakae God susuliga aia e maurisiau!

⁴⁸ Aia e sauvaniau na tangomana na tuliusiaqira igira gaqu gala; maia e mologira danga na puku tavosi i limaqu inau,

⁴⁹ me maurisiau tania na limaqira gaqu gala. Eo Taovia, igoe nogo o sangaau te au gini tangomana na tuliusiaqira gaqu gala, mo isutuguqu tanigira na tinoni vanga tangopeke seko.

⁵⁰ Maia nogoria na rongona ti inau au gini tsonikaego i laoqira na puku tavosi sui; mau teâ na linge na tsonikaeamu.

⁵¹ God e saua na tangomana loki sosongo vania nina taovia tsapakae; me sauvulagia nina galuve vô oli vania aia e vilinogoa, me vaninogoa a David migira na kukuana na dani ma na dani.