ՊԱՒՂՈՍԻ ԱՌԱՔԵԼՈՅ ԱՌ ՀՌՈՎՄԱՅԵՑԻՍ ԹՈՒՂԹ 16 - Գրաբար Աստվածաշունչ (1895)1 Յանձն առնեմ ձեզ զՓիբէ զքոյր մեր, որ է սպասաւոր եկեղեցւոյն Կենքրացւոց. 2 զի զնա ընկալջիք ի Տէր արժանի սրբոց, եւ վերակացու լինիջիք նմա յոր պէտս իրաց եւ կոչեսցէ զձեզ. քանզի եւ նա վերակացու եղեւ բազմաց, եւ ինձ իսկ ի գլխովին։ 3 Ողջոյն տաջիք Պրիսկեայ եւ Ակիւղայ՝ գործակցաց իմոց ի Քրիստոս Յիսուս. 4 որք ընդ անձին իմոյ զիւրեանց պարանոցս մատուցին. զորոց ոչ ես միայն գոհանամ, այլ եւ ամենայն եկեղեցիք հեթանոսաց. 5 եւ առտնին եկեղեցւոյն նոցա։ Ողջոյն տաջիք Եպենտեայ սիրելւոյ իմոյ՝ որ է պտուղ Ասիացւոց ի Քրիստոս։ 6 Ողջոյն տաջիք Մարեայ՝ որ բազում վաստակս վաստակեաց ի ձեզ։ 7 Ողջոյն տաջիք Անդրոնիկեայ եւ Յունեայ ազգականաց իմոց եւ գերեկցաց, որք երեւելիքն իսկ են յառաքեալս, որք եւ յառաջ իսկ քան զիս եղեն ի Քրիստոս։ 8 Ողջոյն տաջիք Ամպղեայ սիրելւոյ իմոյ ի Տէր։ 9 Ողջոյն տաջիք Ուրբանեայ գործակցի իմոյ ի Տէր, եւ Ստաքեայ սիրելւոյ իմոյ։ 10 Ողջոյն տաջիք Ապեղեայ՝ որ ընտիրն է ի Տէր։ 11 Ողջոյն տաջիք նոցա որ յԱրիստաբուղեայ տանէ անտի են։ Ողջոյն տաջիք Հերովդիոնեայ ազգականի իմոյ։ Ողջոյն տաջիք այնոցիկ որք ի Նարկիսեայ տանէն իցեն ի Տէր։ 12 Ողջոյն տաջիք Տրիփոսեայ եւ Տրիփոնեայ վաստակաւորաց ի Տէր։ Ողջոյն տաջիք Պերսիդեայ սիրելւոյ, որ բազում վաստակս վաստակեաց ի Տէր։ 13 Ողջոյն տաջիք Ռուփայ ընտրելոյ ի Տէր, եւ մօր նորա եւ իմոյ։ 14 Ողջոյն տաջիք Ասիւնկրիտեայ, Փղեգոնտեայ, Երմայ, Պատրոբայ, Երմեայ, եւ որ ընդ նոսա եղբարք իցեն։ 15 Ողջոյն տաջիք Փիղողոգեայ, եւ Յուղեայ, Ներեայ եւ քեռ նորա, եւ Ողիմպեայ, եւ որ ընդ նոսա սուրբք ամենեքին իցեն։ 16 Ողջոյն տաջիք միմեանց ի համբոյր սրբութեան. ողջոյն տան ձեզ ամենայն եկեղեցիք Քրիստոսի։ ԷԶ. 17 Աղաչեմ զձեզ, եղբարք, գիտել զայնպիսիսն որ հերձուածս եւ գայթակղութիւնս առնիցեն արտաքոյ վարդապետութեանն զոր դուքն ուսարուք. եւ խորշեցարուք ի նոցանէ։ 18 Զի այնպիսիքն Տեառն մերում Քրիստոսի ոչ ծառայեն, այլ իւրեանց որովայնին. եւ քաղցրաբանութեամբ եւ օրհնութեամբ պատրեն զսիրտս անմեղաց։ 19 Զի ձեր հնազանդութիւնդ առ ամենեսեան հասեալ է. եւ արդ ի ձեզ ուրախ եմ. բայց կամիմ զձեզ իմաստունս լինել ի բարիս, եւ անմեղս՝ ի չարիս։ 20 Եւ Աստուած խաղաղութեան խորտակեսցէ զՍատանայ ընդ ոտիւք ձերովք մերձ ընդ մերձ։ Շնորհք Տեառն մերոյ Յիսուսի Քրիստոսի ընդ ձեզ։ 21 Ողջոյն տայ ձեզ Տիմոթէոս եղբայր եւ՝՝ գործակից իմ եւ Ղուկիոս եւ Յասովն եւ Սոսիպատրոս՝ ազգականք իմ։ 22 (Ողջոյն տամ ձեզ եւ ես Տերտիոս, որ զթուղթս գրեցի, ի Տէր։) 23 Ողջոյն տայ ձեզ Գայիոս ասպնջական իմ եւ ամենայն եկեղեցւոյն։ Ողջոյն տայ ձեզ Երաստոս շահապ քաղաքիս եւ Կուարտոս եղբայր։ 24 Այլ այնմ, որ կարողն է հաստատել զձեզ ըստ աւետարանիս իմում, եւ ըստ քարոզութեանն Յիսուսի Քրիստոսի, ըստ յայտնութեան խորհրդոյն ժամանակօքն յաւիտենից լռեցելոյ, 25 եւ յայտնելոյ այժմիկ ի ձեռն գրոց մարգարէականաց ըստ հրամանի մշտնջենաւորին Աստուծոյ, ի հնազանդութիւն հաւատոց, յամենայն հեթանոսս ծանուցելոյ, 26 Միայնոյ իմաստնոյն Աստուծոյ ի ձեռն Յիսուսի Քրիստոսի, նմա փառք յաւիտեանս։ Ամէն։ 27 Շնորհք Տեառն մերոյ Յիսուսի Քրիստոսի ընդ ձեզ ամենեսեան։՝՝ Առ Հռովմայեցիս գրեցաւ ի Կորնթոսէ ի ձեռն Փիբեայ սարկաւագի։ |