ՍՐԲՈՅՆ ՅՈՎՀԱՆՆՈՒ ԱՌԱՔԵԼՈՅ ԵՒ ԱՍՏՈՒԱԾԱԲԱՆ ԱՒԵՏԱՐԱՆՉԻ՝՝ 8 - Գրաբար Աստվածաշունչ (1895)1 Եւ յորժամ եբաց զկնիքն եւթներորդ, եղեւ լռութիւն յերկինս որպէս կէս ժամու։ 2 Եւ տեսի հրեշտակս եւթն՝՝ որ առաջի Աստուծոյ կային. եւ տուաւ նոցա եւթն փող։ 3 Եւ այլ հրեշտակ եկն եւ եկաց առ սեղանն, եւ ունէր խնկանոց ոսկի, եւ տուաւ նմա խունկ բազում, զի մատուսցէ զաղօթս ամենայն սրբոց ի վերայ ոսկեղէն սեղանոյ առաջի աթոռոյն։ 4 Եւ ել ծուխ խնկոցն՝ աղօթք սրբոցն ի ձեռաց հրեշտակացն՝՝ առաջի Աստուծոյ։ 5 Եւ ելից հրեշտակն զխնկանոցն՝՝ ի հրոյ սեղանոյն, եւ արկ զնա յերկիր. եւ եղեւ որոտումն եւ ձայնք եւ փայլատակումն եւ շարժումն մեծ։ 6 Եւ եւթն հրեշտակքն որ ունէին եւթն փողս՝ պատրաստեցին զինքեանս առ ի հարկանել։ 7 Եւ առաջին հրեշտակն եհար զփողն, եւ եղեւ կարկուտ եւ հուր եւ արիւն խառնեալ, եւ անկաւ յերկիր, եւ զերրորդ մասն երկրի այրեաց, եւ զերրորդ մասն ծառոց այրեաց, եւ զամենայն դալար խոտոյ այրեաց։ 8 Եւ երկրորդ հրեշտակն փողեաց, եւ իբրեւ զլեառն մի մեծ հրդեհեալ անկաւ ի ծով, եւ եղեւ երրորդ մասն ծովու արիւն. 9 եւ սատակեցաւ երրորդ մասն լուղակաց, եւ որ ունէր շունչ կենդանի ապականեցաւ՝՝։ 10 Եւ երրորդ հրեշտակն փողեաց, եւ անկաւ յերկնից աստղ մի մեծ՝ բորբոքեալ իբրեւ զղամբար, եւ անկաւ յերրորդ մասն գետոց եւ աղբերաց. 11 եւ էր անուն աստեղն Դառնութիւն. եւ բազումք մեռան ի դառնութենէ ջուրցն՝՝։ 12 Եւ չորրորդ հրեշտակն փողեաց, եւ վիրաւորէր երրորդ մասն արեգական եւ երրորդ մասն լուսնի եւ երրորդ մասն աստեղաց. եւ խաւարէր՝՝ երրորդ մասն նոցա, եւ երրորդ մասն գիշերոյ՝՝ նոյնպէս։ 13 Եւ տեսի եւ լուայ ձայն հրեշտակի թռուցելոյ ի մէջ երկնից զի ասէր ի ձայն մեծ. Վա՜յ, վա՜յ, վա՜յ, որ բնակեալ են յերկրի, յորժամ լինիցի ձայն երիցն եւս փողոց զոր կամիցին հրեշտակքն՝՝ հարկանել։ |