ԳԻՐՔ ՍԱՂՄՈՍԱՑ 92 - Գրաբար Աստվածաշունչ (1895)ՍԱՂՄՈՍ ՂԲ (ՂԳ) Յօրն առաջին շաբաթու յոր հաստատեցաւ երկիր. օրհնութիւն գովութեան Դաւթի։՝՝ 1 Տէր թագաւորեաց՝ վայելչութիւն զգեցաւ, զգեցաւ Տէր զօրութիւն՝ ընդ մէջ իւր ածաւ։ 2 Հաստատեաց զաշխարհ զի մի՛ սասանեսցի. պատրաստ է աթոռ քո ի սկզբանէ, յաւիտեանս դու ես։ 3 Ամբարձան գետք, Տէր, եւ ամբարձին գետք զձայնս իւրեանց. յարիցեն գետք ի գնացս իւրեանց։ 4 Ի ձայնէ ջուրց բազմաց, սքանչելի եղեն զբօսանք ծովու. սքանչելի ես դու, Տէր, ի բարձունս։՝՝ 5 Վկայութեանց քոց մեք յոյժ հաւատացաք. տան քում վայելէ սրբութիւն, Տէր, ընդ երկայն աւուրս։ |