ԳԻՐՔ ՍԱՂՄՈՍԱՑ 59 - Գրաբար Աստվածաշունչ (1895)ՍԱՂՄՈՍ ԾԹ (Կ) 1 Ի կատարած. զառանցելոց ժամանակաց առ ուսմանէ. 2 ի ժամանակի զի հրձիգ արար նա զՄիջագետս եւ զԱսորեստանն Սոբողայ, եւ ի դարձին հարկանէր Յովաբ զձորն Աղտից յերկոտասան հազարս. արձանագիր. Սաղմոս Դաւթի։ 3 Աստուած, մերժեցեր եւ աւերեցեր զմեզ, բարկացար եւ գթասցիս ի մեզ։ 4 Շարժեցեր զերկիր եւ խռովեցուցեր զսա, բժշկեա զհարուածս սորա զի սասանեցաւ։ 5 Ցուցեր ժողովրդեան քում խստութիւն, եւ ետուր ըմպել մեզ գինի յիմարութեան։ 6 Ետուր երկիւղածաց քոց նշան, զի ապրեսցին յերեսաց աղեղան։ 7 Որպէս փրկեցան սիրելիք քո, կեցո աջով քո եւ լուր մեզ։ 8 Աստուած խօսեցաւ ի սրբութենէ իւրմէ, ցնծացայց, բարձր եղէց, բաժանեցայց զՍիւքէմ, եւ զհովիտսն Յարկաց չափեցից։ 9 Իմ է Գաղաադ եւ իմ է Մանասէ, Եփրեմ հզօրիչ գլխոյ իմոյ, Յուդայ թագաւոր իմ, Մովաբ աւազան յուսոյ իմոյ. 10 ՅԵդովմէ ուղղեցից զգնացս իմ, եւ ինձ այլազգիք հնազանդ եղեն՝՝։ 11 Ո՞ տարցի զիս ի քաղաք ամուր, կամ ո՞ առաջնորդեսցէ ինձ մինչեւ յԵդովմէ. 12 եթէ ոչ դու, Աստուած, որ մերժեցեր զմեզ, եւ ոչ ելեր, Աստուած, ընդ զօրս մեր։ 13 Տուր մեզ օգնութիւն ի նեղութեան, զի ընդունայն է փրկութիւն մարդոյ։ 14 Աստուծով արասցուք զօրութիւն, եւ նա արհամարհեսցէ զայնոսիկ որ նեղեն զմեզ։ |