ԳԻՐՔ ՍԱՂՄՈՍԱՑ 51 - Գրաբար Աստվածաշունչ (1895)ՍԱՂՄՈՍ ԾԱ (ԾԲ) 1 Ի կատարած. Սաղմոս՝՝ Դաւթի. 2 ի ժամանակի զի եկն Դովեկ Եդովմայեցի պատմեաց Սաւուղի, թէ՝ Ահաւասիկ Դաւիթ ի տան Աքիմելիքայ է։ 3 Զի՞ պարծի ի չարութեան, հզօր, զանօրէնութիւն. 4 զօրհանապազ զանիրաւութիւն՝՝ խորհեցաւ ի լեզուի իւրում, որպէս ածելի սուր սրեաց զնենգութիւն։ 5 Սիրեաց զչարութիւն քան զբարութիւն. զանօրէնութիւն քան զխօսս արդարութեան։ 6 Սիրեաց նա զամենայն խօսս կործանման, եւ զլեզուս նենգաւորս։ 7 Վասն այսորիկ Աստուած կործանեսցէ զնա ի սպառ, խլեսցէ եւ հանցէ զնա ի յարկաց իւրոց եւ զարմատս նորա յերկրէն կենդանեաց։ 8 Տեսցեն արդարք եւ երկիցեն, զնովաւ ծիծաղեսցին եւ ասասցեն. 9 Այս այր է որ ոչ արար զԱստուած իւր օգնական, այլ յուսացաւ սա ի բազում մեծութիւն իւր, եւ զօրացաւ ի նանրութեան իւրում։ 10 Այլ ես որպէս ձիթենի պտղալից ի տան Աստուծոյ. յուսացայ յողորմութիւն Աստուծոյ յաւիտեան եւ յաւիտեանս յաւիտենից։ 11 Խոստովան եղէց քեզ յաւիտեան զի արարեր, եւ համբերից անուան քում, զի քաղցր է առաջի սրբոց քոց։ |